అగ్రరాజ్యం అమెరికా అధ్యక్ష పీఠానికి వచ్చే యేడాది ఎన్నికలు జరుగనున్నాయి. ఈ ఎన్నికల్లో పోటీ చేస్తానని మరో ప్రవాస భారతీయుడు ప్రకటించారు. ఇంజనీర్ అయిన ఈయన పేరు హర్షవర్థన్ సింగ్. వచ్చే యేడాది జరిగే అమెరికా అధ్యక్ష ఎన్నికల్లో పోటీ చేయనున్నట్టు ఆయన అధికారికంగా ప్రకంటించారు. ఈ మేరకు ఆయన తన అభ్యర్థిత్వాన్ని ఫెడరల్ ఎలక్షన్ కమిషన్ వద్ద నమోదు చేయించుకున్నారు.
వచ్చే ఎన్నికల్లో పోటీ చేసేందుకు ఇప్పటికే ఇద్దరు భారతీయ అమెరికన్లు... నిక్కీ హేలీ(51), వివేక్‌ రామస్వామి(37) ఈ బరిలో ఉన్న విషయం తెలిసిందే. అయితే, ఈ ముగ్గురు కూడా రిపబ్లికన్‌ పార్టీ తరపున పోటీకి దిగేందుకు ప్రయత్నిస్తుండడం గమనార్హం.
ఈ పార్టీకే చెందిన అమెరికా మాజీ అధ్యక్షుడు డొనాల్డ్‌ ట్రంప్‌ మళ్లీ పోటీ చేస్తానని ప్రకటించిన విషయం తెలిసిందే. అధ్యక్ష పదవికి పోటీ చేసే అభ్యర్థుల విషయంలో రిపబ్లికన్లలో తీవ్ర పోటీ నెలకొంది. ఆ పార్టీ అభ్యర్థిగా పోటీలో ఎవరు ఉండాలో రిపబ్లికన్ల జాతీయ సదస్సు తేలుస్తుంది.