పెళ్లికి ముందే తొందరపడిన ఓ యువతి.. ప్రియుడు చేతిలో మోసపోయింది. ప్రేమ, పెళ్లి పేరుతో నమ్మించి గర్భవతిని చేసిన ప్రియుడు.. చివరకు ఆమెను పెళ్లి చేసుకునేందుకు నిరాకరించాడు. అంతేకాకుండా.. కడుపులో పెరుగుతున్న బిడ్డతో పాటు పాటు నువ్వుకూడా చనిపోవాలంటూ బెదిరించాడు. దీంతో దిక్కుతోచని ఆ యువతి.. న్యాయం కోసం పోలీసులను ఆశ్రయించింది.
ఈ ఘటన హైదరాబాద్ నగరంలోని వికారాబాద్‌లో జరిగింది. తాజాగా వెలుగులోకి వచ్చిన ఈ వివరాలను పరిశీలిస్తే, వికారాబాద్‌కు చెందిన కర్రె అనూష (22) 2017 సంవత్సరంలో ఒవైసీ నర్సింగ్‌ కాలేజీలో బీఎస్సీ నర్సింగ్‌ 3వ సంవత్సరం చదువుతోంది.
ఆ సమయంలో హస్తినాపురంకు చెందిన విజయ్‌కుమార్‌తో ఏర్పడిన పరిచయం కాస్త ప్రేమగా మారింది. పెళ్లి చేసుకుంటానని అనూషను నమ్మించి, పెళ్ళికి ముందే శారీరకంగా ఒక్కటయ్యారు. ఈ క్రమంలో అనూష గర్భం దాల్చడంతో విజయ్‌కుమార్‌ పెళ్లి చేసుకోకపోగా ఎలాగైనా వదిలించుకోవాలని నిర్ణయించుకున్నాడు.
తాజాగా ఓ దొంగతనం కేసులో అనూష జైలుకు వెళ్లడంతో అప్పటి నుంచి విజయ్‌కుమార్‌ ఫోన్‌ స్విచ్చాఫ్‌ చేసి కనిపించకుండా పోయాడు. జైలు నుంచి బయటకు వచ్చిన అనూష వెంటనే విజయ్‌కుమార్‌ తల్లిదండ్రులకు ఫోన్‌ చేయగా నువ్వు, నీ కడుపులో ఉన్న బిడ్డ ఇద్దరు చచ్చిపోండని బెదిరించారు.
విజయ్‌కుమార్‌ స్పందించకపోవడంతో తాను మోసపోయానని గ్రహించన అనూష న్యాయం చేయాలని కోరుతూ మంగళవారం పోలీసులకు ఫిర్యాదు చేసింది. ఈ మేరకు పోలీసులు విజయ్‌కుమార్‌పై కేసు నమోదు చేసి దర్యాప్తు చేస్తున్నారు.