మజ్లిస్ పార్టీ శాసనసభా నాయకుడు అక్బరుద్దీన్ ఒవైసీ కాంగ్రెస్ ప్రభుత్వాన్ని తీవ్రంగా విమర్శించారు. అసెంబ్లీ గాంధీ భవన్ లాగా కాకుండా శాసనసభా సంస్థగా పనిచేయాలని అన్నారు. సమావేశాలు జరుగుతున్న తీరుపై అసంతృప్తి వ్యక్తం చేస్తూ, మజ్లిస్ పార్టీ సభ్యులు నిరసనగా వాకౌట్ చేశారు.
అసెంబ్లీ కార్యకలాపాలను సమర్థవంతంగా నిర్వహించడంలో ప్రభుత్వం విఫలమైందని అక్బరుద్దీన్ ఒవైసీ ఆరోపించారు. "మీరు సభలో ప్రజాస్వామ్యాన్ని ఖూనీ చేయబోతున్నారా?" అని ఆయన ప్రశ్నించారు. తెలంగాణ శాసనసభ గాంధీ భవన్ కాదని ఫైర్ అయ్యారు.
ఈ వ్యత్యాసాన్ని గుర్తించాలని పాలక పార్టీని కోరారు. ప్రతిపక్ష సభ్యులను మాట్లాడటానికి అనుమతించడం లేదని, వారు తమ అభిప్రాయాలను వ్యక్తపరచాలనుకున్నప్పుడు మైక్రోఫోన్లు ఇవ్వడం లేదని ఫిర్యాదు చేశారు. సభ్యుల ప్రశ్నలను విస్మరించడం సరికాదని పేర్కొంటూ, పాలక పార్టీ వైఖరిని విమర్శించారు.
ప్రశ్నలను మార్చడం, తారుమారు చేయడం జరుగుతుందని కూడా అక్భరుద్ధీన్ ఆరోపించారు. కాంగ్రెస్ ప్రభుత్వం అసెంబ్లీని నిర్వహించే తీరుకు నిరసనగా, అక్భరుద్దీన్ ఒవైసీ వాకౌట్ ప్రకటించారు.