మరింతగా విషమించిన పోప్ ఫ్రాన్సిస్ ఆరోగ్యం!!

పోప్ ఫ్రాన్సిస్ ఆరోగ్యం మరింతగా విషమించింది. ఈ నెల 14వ తేదీ నుంచి ఊపిరితిత్తుల ఇన్ఫెక్షన్‌తో బాధపడుతూ రోమ్ నగరంలోని గెమిల్లీ ఆస్పత్రిలో 88 యేళ్ల పోప్ ఫ్రాన్సిస్ చికిత్స పొందుతున్నారు. ముఖ్యంగా, శ్వాస తీసుకోవడంలో ఆయన మరింతగా ఇబ్బందిపడుతున్నారు. దీంతో అధిక పీడనంతో ఆక్సిజన్ అందిస్తున్నారు. ఎనీమియా సంబంధిత సమస్య కూడా ఆయనకు ఉన్నట్టు వైద్యులు గుర్తించారు. దీంతో ఆయనకు రక్తమార్పిడి కూడా చేశఆరు. దీంతో శుక్రవారం కంటే ఇపుడు ఆయన ఆరోగ్య పరిస్థితి మరింత కష్టంగా ఉందని, ప్రస్తుత పరిస్థితుల్లో ఏమీ చెప్పలేమని వాటికన్ సిటీ ఓ పత్రికా ప్రకటనలో పేర్కొంది. 

పోప్ న్యూమోనియాతోపాటు తీవ్రమైన శ్వాసకోశ ఇన్ఫెక్షన్‌తో బాధపడుతున్నారని వైద్యులు తెలిపారు. మరో వారం రోజుల పాటు ఆస్పత్రిలో ఉండాల్సి వస్తుందని పేర్కొన్నారు. మరోవైపు, ప్రమాదం నుంచి పోప్ బయటపడలేదని ఆయన వ్యక్తిగత ఫిజీషియన్ లూగీ కార్పొన్ వెల్లడించారు. 

అర్జెంటీనా రాజధాని బ్యూనస్ ఎయిర్స్‌లో 1936లో జన్మించిన పోప్.. అసలు పేరు జార్జ్ మారియో బెర్గోగ్లియో. 2013లో నాటి పోప్  బెనెడిక్ట్16 రాజీనామా చేయడంతో ఫ్రాన్సిస్ కేథలిక్ చర్చి అధిపతిగా నియమితులయ్యారు. కాగా, దక్షిణార్థ గోళం నుంచి పోప్ అయిన తొలి వ్యక్తిగా ఆయన సరికొత్త రికార్డును నెలకొల్పారు.