మీ పిల్లలు ఈ వేసవి సెలవుల్లో 8వ తరగతి పాసై తొమ్మిదో తరగతిలోకి అడుగుపెట్టనున్నారా? వారి శాస్త్ర పరిజ్ఞానాన్ని మరింతగా పెంచుకోవడానికి ఒక మార్గాన్ని వారికి తెలియజేయండి. ఈ సెలవులను చక్కగా సద్వినియోగం చేసుకునే అవకాశం ఇస్రో వారికి కల్పిస్తోంది. ఈ వేసవి సెలవుల్లో ఇస్రో చేపట్టనున్న యువ విజ్ఞాన కార్యక్రమంలో వారిని చేర్పించవచ్చు.
నాసా అంతరిక్ష సాంకేతిక వైజ్ఞానిక అంశాలు, దీనికి సంబంధించిన ప్రయోగాలు వంటి అంశాలపై హాలిడేస్‌లో పిల్లలకు అవగాహన కల్పించనున్నారు. దేశంలోని 4 ఇస్రో కేంద్రాల్లో రెండు వారాల పాటు ఈ కోర్సు నేర్పిస్తారు. హాస్టల్ సదుపాయం కూడా ఉంటుంది. ఇందుకోసం ప్రతి రాష్ట్రం, కేంద్ర పాలిత ప్రాంతాల నుంచి ముగ్గురు ఆసక్తి గల విద్యార్థులను ఎంపిక చేస్తారు. గ్రామీణ విద్యార్థులకు అధిక ప్రాధాన్యం ఉంటుంది.
అర్హత: 8వ తరగతి పరీక్షల్లో 50 శాతం మార్కులు వచ్చి ఉండాలి.
ఆసక్తి గల విద్యార్థులు ఇస్రో అధికారిక వెబ్‌సైట్‌కి లాగిన్ అయి రిజిస్ట్రేషన్ చేసుకోవచ్చు.