యాడ్ తెచ్చిన తంటా : లవ్ జిహాద్‌కు తనిష్క్ మద్దతా? బాయ్‌కాట్ తనిష్క్ అంటూ ప్రచారం...

దేశంలో ఉన్న ప్రముఖ ఆభరణాల నగల తయారీ కంపెనీల్లో ఒకటి తనిష్క్ జ్యూవెలరీ. ఇది తాజాగా విడుదల చేసిన యాడ్ పెను దుమారం రేపింది. ఈ యాడ్ లవ్ జిహాద్‌ను ప్రేరేపించేదిగా ఉందని పేర్కొంటూ సోషల్ మీడియాలో ట్రోల్ అవుతోంది. పైగా, నెటిజన్లు తీవ్ర స్థాయిలో విమర్శలు గుప్పిస్తున్నారు. అంతేకాకుండా, బాయ్‌కాట్ తనిష్క్ అంటూ ఓ హ్యాష్‌ట్యాగ్ ట్రెండ్ అవుతోంది. 

ఇతకీ ఈ వివాదం వివరాలను పరిశీలిస్తే, ఇటీవల తనిష్క్ 'ఏకత్వం' పేరిట కొత్త నగల కలెక్షన్ తీసుకువచ్చింది. అయితే, ఈ 'ఏకత్వం' కలెక్షన్‌ను ప్రచారం చేసేందుకు రూపొందించిన వాణిజ్య ప్రకటన వివాదాస్పమైంది. ఇది లవ్ జిహాద్‌ను ప్రోత్సహించేలా ఉందంటూ సోషల్ మీడియాలో దుమారం రేగింది. దాంతో వెనక్కి తగ్గిన తనిష్క్ తన యాడ్‌ను సామాజిక మాధ్యమాల నుంచి తొలగించింది.

ఇంతకీ ఆ యాడ్‌లో ఏముందంటే... ఓ ముస్లిం కుటుంబం తమ ఇంటికి ఓ హిందూ యువతిని కోడలిగా ఆహ్వానిస్తుంది. ఆ హిందూ యువతికి హిందూ సంప్రదాయం ప్రకారమే సీమంతం నిర్వహిస్తారు. ఈ యాడ్ వీడియోలో కొన్ని వ్యాఖ్యలు కూడా ఉంటాయి. "తమ కన్నబిడ్డలా ఆదరించే ఇంటికి ఆమె కోడలిగా వెళ్లింది. ఆమె కోసం ఆ కుటుంబానికి చెందినవారు తమ సంప్రదాయాన్ని పక్కనబెట్టి వేడుక చేశారు. మామూలుగా అయితే ఇలా చేయరు. ఇది రెండు భిన్నమైన మతాలు, సంప్రదాయాలు, సంస్కృతుల అందమైన కలయిక" అంటూ తనిష్క్ అభివర్ణించింది.

ఈ తరహా అభివర్ణన నెటిజన్లకు ఆగ్రహం తెప్పించింది. ఈ యాడ్‌తో లవ్ జిహాద్‌కు తనిష్క్ మద్దతు పలుకుతున్నట్టుగా ఉందని, ఈ ప్రకటనను నిషేధించాలని సోషల్ మీడియాలో ఆగ్రహం వ్యక్తం చేశారు. బాయ్‌కాట్ తనిష్క్ అనే హ్యాష్ ట్యాగ్‌తో హోరెత్తించారు. మంగళవారం, బుధవారం ఇదే ట్రెండింగ్‌లో ఉండటంతో తనిష్క్ తన యాడ్ వీడియోను తొలగించింది.