బిడ్డను రక్షించిన సిబ్బందికి తొండంపైకెత్తి కృతజ్ఞతలు చెప్పిన ఏనుగు!! (వీడియో)

ప్రమాదంలో చిక్కుకున్న తన బిడ్డను రక్షించిన అటవీ సిబ్బందికి ఓ ఏనుగు తొండం పైకెత్తి కృతజ్ఞతలు తెలిపింది. దీనికి సంబంధించిన ఓ వీడియోను అటవీ శాఖ అధికారి సోషల్ మీడియాలో పోస్ట్ చేయగా, అది వైరల్ అయింది. 

తాజాగా వెలుగులోకి వచ్చిన ఈ వివరాలను పరిశీలిస్తే, ఓ అటవీ ప్రాంతంలోని ఓ గున్న ఏనుగు ఓ గుంతలో పడిపోయింది.. దాన్ని బయటకు తీసేందుకు కొన్ని ఏనుగులు ప్రయత్నించగా, వాటి ప్రయత్నాలు ఫలించలేదు. 

ఈ విషయం తెలుసుకున్న అటవీ శాఖ సిబ్బంది వెంటనే అక్కడికి చేరుకున్నారు. అటవీ సిబ్బందిని చూడగానే ఆ ఏనుగులు దూరంగా వెళ్లిపోయాయి. ఆ తర్వాత అటవీ సిబ్బంది ప్రొక్లెయిన్‌ సహాయంతో గున్న ఏనుగును ప్రమాదం నుంచి సురక్షితంగా రక్షించాయి. 

ఆ గున్న ఏనుగు బయటకు వచ్చిరాగానే తన తల్లివద్దకు చేరుకుంది. దీంతో అప్పటివరకు అక్కడే ఉన్న మిగిలిన ఏనుగులన్నీ తమదారిన తాము వెళ్లిపోయాయి. ఈ సమయంలో గున్న ఏనుగు తల్లి ఏనుగు కాసేపు ఆగి, అటవీ అధికారులు, సిబ్బంది వైపు తిరిగి తొండం పైకెత్తి కృతజ్ఞతలు తెలిపింది. ఐఎఫ్ఎస్ అధికారి ప్రవీణ్ కశ్వాన్ తన ట్విట్టర్ ఖాతాలో పోస్టు చేశారు.