యంగ్ రెబల్ స్టార్ ప్రభాస్ ఇటీవల మహానటి డైరెక్టర్ నాగ్ అశ్విన్‌తో సినిమాని ఎనౌన్స్ చేసిన విషయం తెలిసిందే. ఈ సినిమా ఈ సంవత్సరం చివరిలో సెట్స్ పైకి వెళ్లనుంది. ప్రముఖ నిర్మాణ సంస్థ వైజయంతీ మూవీస్ ఈ సినిమాని నిర్మిస్తుంది. ప్రస్తుతం ఈ సినిమాకి సంబంధించి ప్రీ ప్రొడక్షన్ వర్క్ జరుగుతుంది.
ఇదిలా ఉంటే... సాహో సినిమా ఆశించిన స్ధాయిలో ఆకట్టుకోకపోవడంతో ప్రభాస్ సినిమా ఎప్పుడెప్పుడు థియేటర్ లోకి వస్తుందా అని ఫ్యాన్స్ ఎదురు చూస్తున్నారు. ప్రస్తుతం జిల్ ఫేమ్ రాధాకృష్ణ కుమార్‌తో ప్రభాస్ ఓ భారీ చిత్రంలో నటిస్తున్నారు. పిరియాడిక్ లవ్ స్టోరీగా రూపొందుతోన్న ఈ సినిమాలో ప్రభాస్ సరసన క్రేజీ హీరోయిన్ పూజా హేగ్డే నటిస్తుంది.
ఈ భారీ చిత్రాన్ని యు.వి.క్రియేషన్స్, గోపీకృష్ణా మూవీస్ సంయుక్తంగా నిర్మిస్తున్నాయి. ఏమాత్రం రాజీపడకుండా మంచి క్వాలిటీతో.. భారీ బడ్జెట్ తో ఈ సినిమాని నిర్మిస్తున్నారు. అయితే.. ఈ సినిమాకి సంబంధించి ఎలాంటి అప్‌డేట్స్ లేకపోవడంతో ప్రభాస్ ఫ్యాన్స్ యు.వి.క్రియేషన్స్ నిర్మాతల్ని ట్రోల్ చేయడం స్టార్ట్ చేసారు. దీంతో ఫ్యాన్స్ ట్రోల్ చేయడం చూసి ఇక లాభం లేదనుకుని ఈ సినిమా నిర్మాతలు ట్విట్టర్లో స్పందిస్తూ... ప్రభాస్ మూవీ ఇంటర్నేషనల్ స్టాండర్ట్స్‌తో క్యూట్ ఛేజ్ సీన్ పూర్తయ్యిందని.. త్వరలో మరో భారీ యూరప్ షెడ్యూల్ ఉందని తెలియచేసింది.
ఈ క్రేజీ మూవీలో రెబల్ స్టార్ కృష్ణంరాజు ముఖ్య పాత్ర పోషిస్తుండడం విశేషం. ఇదిలా ఉంటే.. ఈ సినిమా టైటిల్ జాన్ అంటూ ప్రచారం జరిగింది. ఆ తర్వాత 96 తెలుగు రీమేక్‌కి జాను అని టైటిల్ పెట్టడంతో ప్రభాస్ మూవీకి వేరే టైటిల్ పెట్టనున్నారు. ఈ సినిమా కోసం యు.వి.క్రియేషన్స్ ఓ డియర్, రాధే శ్యామ్ అనే రెండు టైటిల్స్‌ని పరిశీలిస్తున్నారు. ఈ రెండు టైటిల్స్‌లో ఒక టైటిల్‌ను త్వరలో ఖరారు చేయనున్నట్టు సమాచారం. టైటిల్‌ను ఖరారు చేసి, టైటిల్‌తో కూడిన ఫస్ట్ లుక్‌ను ఉగాది రోజున రిలీజ్ చేయనున్నట్టు తెలిసింది.
సో.. ఈ ఉగాది రోజున ప్రభాస్ అభిమానులకు మంచి గిఫ్ట్‌నే ఇవ్వనున్నారు. ప్రభాస్, పూజా హేగ్డేలపై చిత్రీకరించిన లవ్ సీన్స్ ఈ చిత్రానికి హైలెట్‌గా నిలుస్తాయని డైరెక్టర్ రాధాకృష్ణ కుమార్ తెలియచేసారు. అలాగే కృష్ణంరాజు, ప్రభాస్ లపై చిత్రీకరించనున్న సీన్స్ చాలా బాగుంటాయని.. ఫ్యాన్స్ కు అయితే... పండగే అన్నట్టుగా ఉంటుందని చిత్ర యూనిట్ మెంబర్స్ చెబుతున్నారు. తెలుగుతో పాటు ఇతర భాషల్లోను ఈ సినిమాను భారీ స్థాయిలో విడుదల చేయనున్నారు.ఈ సినిమా షూటింగ్ కంప్లీట్ చేసుకుని.. నవంబర్ నుంచి ప్రభాస్ నాగ్ అశ్విన్ తో చేయనున్న మూవీ షూటింగ్ లో జాయిన్ అవుతారని తెలిసింది.