స్వర్గీయ ఎన్టీఆర్ జీవిత చరిత్ర ఆధారంగా తెరకెక్కుతున్న చిత్రం ఎన్టీఆర్ బయోపిక్. "కథానాయకుడు", "మహానాయకుడు" అనే పేర్లతో రెండు భాగాలుగా రానున్న ఈ చిత్రం ట్రైలర్ రిలీజ్ తేదీని ఖరారు చేశారు. క్రిష్ దర్శకత్వం వహించే ఈ చిత్రాన్ని నందమూరి బాలకృష్ణ హీరోగా నటిస్తూ నిర్మిస్తున్నారు.
రెండు భాగాలుగా రూపొందుతున్న ఈ చిత్రం "కథానాయకుడు" పేరుతో జ‌న‌వ‌రి 9న విడుదల కానుండ‌గా, "మహానాయకుడు" పేరుతో జ‌న‌వ‌రి 24న రిలీజ్ కానుంది. అయితే ఈ చిత్రానికి సంబంధించి ప్ర‌మోష‌న్ కార్య‌క్ర‌మాలను చిత్ర యూనిట్ వేగవంతం చేసింది. ఇప్పటికే చిత్రానికి సంబంధించి రెండు సాంగ్స్ విడుదల చేసిన టీం ఈ సినిమా ట్రైలర్‌ను డిసెంబరు 16న హైదరాబాద్‌లో ఏర్పాటుచేయనున్న కార్యక్రమంలో విడుదల చేయనున్నట్లు చిత్ర బృందం ప్రకటించింది.
ఇక డిసెంబరు 21న నిమ్మకూరులో ఆడియో విడుదల వేడుకను ఘనంగా ఏర్పాటు చేయనున్నట్లు వెల్లడించింది. కీర‌వాణి స్వ‌రాలు స‌మాకూరుస్తున్న ఈ చిత్రంలో ఎన్టీఆర్ సతీమణి బసవతారకంగా విద్యాబాలన్‌, నారా చంద్రబాబు నాయుడుగా రానా, హరికృష్ణగా కల్యాణ్‌రామ్, అక్కినేని నాగేశ్వరరావుగా సుమంత్‌, జయప్రదగా హన్సిక, జయసుధగా పాయల్‌ రాజ్‌పుత్‌, శ్రీదేవిగా రకుల్‌ప్రీత్‌ సింగ్‌, సావిత్రిగా నిత్యా మేనన్‌, ప్రభగా శ్రియతో పాటు మరికొంతమంది సినీ ప్రముఖులు నటిస్తున్న విషయం తెల్సిందే.