నటసార్వభౌముడు నందమూరి తారక రామారావు జీవితం ఆధారంగా తెరకెక్కుతున్న చిత్రం ఎన్టీఆర్ బయోపిక్. క్రిష్ జాగర్లమూడి దర్శకత్వంలో తెరకెక్కుతున్న ఈ చిత్రాన్ని రెండు భాగాలుగా విడుదల చేయనున్నారు. 'కథానాయకుడు', మహానాయకుడు అనే పేర్లతో ఈ చిత్రం ప్రేక్షకుల ముందుకు సంక్రాంతికిరానుంది.
ఇందులో భాగంగా ఇప్పటికే పలువురు నటీనటుల వివరాలు వెల్లడయ్యాయి. ఈ సినిమా నుంచి ముఖ్యమైన కొన్ని పాత్రలకి సంబంధించిన ఫస్ట్‌లుక్స్ వచ్చి అంచనాలు పెంచాయి. తాజాగా కథానాయకుడు మూవీకి సంబంధించి తొలి పాటను రిలీజ్ చేశారు. ఎన్టీఆర్ కెరీర్ గురించి.. ఆయన వేసిన పాత్ర‌ల గురించి.. ప్రేక్ష‌కుల్లో ఆయ‌న‌కు ఉన్న ఇమేజ్ వ‌ర్ణిస్తూ కీరవాణి తండ్రి, రచయిత శివ‌శ‌క్తిద‌త్తా, మరో రచయిత రామకృష్ణలు పూర్తి సంస్కృత పదాలతో రాసిన ఈ పాట అందరి ప్రశంసలు అందుకుంటోంది. ఎన్టీఆర్ గొప్ప‌తనాన్ని వ‌ర్ణిస్తూ ఆయన గౌర‌వాన్ని పెంచేలా ఈ పాట ఉందని ఫ్యాన్స్ అంటున్నారు.
ముఖ్యంగా, కీరవాణి సంగీత బాణీలకు కైలాష్ ఖేర్ స్వరం సరిగ్గా అచ్చుగుద్దినట్టు సరిపోయిందని అంటున్నారు. 'ఘ‌న‌కీర్తిసాంధ్ర విజితాఖిలాంధ్ర జ‌న‌తాసుధీంధ్ర మ‌ణిదీప‌కా ఓ కథానాయకా' అంటూ మొద‌లైన ఈ పాట మ‌ధ్య‌లో మ‌రిన్ని అద్భుతమైన ప‌దాల‌ను కూర్చారు శివ‌శ‌క్తిద‌త్త. ముఖ్యంగా 'త్రిశ‌కాధికా చిత్ర‌మాలికా ఓ కథానాయకా.. ఆహార్యాధ్భుత వాచికా జైత్ర‌యాత్రికా' అంటూ ఎన్టీఆర్ చేసిన ప్ర‌తీపాత్ర‌ను త‌న పాట‌లో చూపించారు.
