వివాదాస్పద దర్శకుడు రామ్ గోపాల్ వర్మ మళ్లీ వార్తల్లో నిలిచాడు. దేశ వ్యాప్తంగా మీటూ ఉద్యం సాగుతున్న నేపథ్యంలో మీటూపై వర్మ స్పందించాడు. సినీ ఇండస్ట్రీకి చెందిన పలువురు హీరోయిన్లు తమకు జరిగిన చేదు అనుభవాల గురించి నిర్మొహమాటంగా బయటికి వెల్లగక్కుతున్న నేపథ్యంలో.. ఈ ఉద్యమంలో తన పేరు రాకపోవడం తనకెంతో ఆశ్చర్యాన్ని కలిగించిందని వర్మ వ్యాఖ్యానించాడు.
తనను అందరూ అలాంటి వాడని అంటుంటారు. మీటూ ఉద్యమంలో భాగంగా ఎందరి పేర్లో వెలుగులోకి వచ్చాయి. తన పేరు మాత్రం బయటకు రాలేదు. ఇది బాలీవుడ్ ప్రముఖులను షాక్‌కు గురి చేసింది. పొద్దున లేస్తే తొడల గురించి మాట్లాడుతూ.. జీఎస్టీ వంటి సినిమాలు చేస్తుంటే తన గురించి ఇక ఏం చెబుతారు.. అంటూ తనదైన శైలిలో వ్యాఖ్యానించాడు. కాగా తాజాగా రామ్ గోపాల్ వర్మ సమర్పణలో భైరవగీత విడుదలకు సిద్ధమవుతోంది.
మరోవైపు క్రిష్ దర్శకత్వంలో రూపొందుతున్న ఎన్టీఆర్ బయోపిక్‌కు పోటీగా వర్మ లక్ష్మీస్ ఎన్టీఆర్ సినిమాను తెరకెక్కిస్తున్న సంగతి తెలిసిందే. ఈ సినిమా కథను గతంలో లక్ష్మీ పార్వతికి వినిపిస్తానని వర్మ చెప్పాడు. కానీ ప్రస్తుతం మాట మార్చాడు. లక్ష్మీస్ ఎన్టీఆర్ స్క్రిప్టును ఎవరికీ వినిపించాల్సిన అవసరం లేదంటూ షాకిచ్చాడు. దీంతో మరో కొత్త వివాదానికి వర్మ తెరలేపాడు.
