ఫస్ట్ డే ఫస్ట్ షో.. సీక్రెట్ చెప్పిన చిరంజీవి.. కొబ్బరి మట్టతో చితకబాదారు..

ఫస్ట్ డే ఫస్ట్ షో అనే మూవీ ప్రీ రిలీజ్ ఈవెంట్‌కు ముఖ్య అతిథిగా వచ్చిన మెగాస్టార్ చిరంజీవి.. తన జీవితంలో ఫస్ట్ డే ఫస్ట్ షో అనుభవం చాలా దారుణమైందని చిరంజీవి అన్నారు. ఇప్పటివరకు ఎక్కడా ఎవ్వరిముందు చెప్పని ఓ సీక్రెట్ ఇప్పుడు చెబుతా అంటూ చిరంజీవి చెప్పిన సంగతులు నెట్టింట వైరల్ అవుతున్నాయి. 

అది ఏ సంవత్సరమో గుర్తు లేదు కానీ ఎన్టీఆర్ గారి రాము సినిమా ఫస్ట్ షో చూడాలని వెళ్లి చావు దెబ్బలు తిన్నామని చిరంజీవి చెప్పారు. ఆ సినిమాకు తనతో పాటు తమ్ముడు నాగబాబును కూడా తీసుకెళ్లానని.. అయితే ఆ సమయంలో నాన్నకు అడ్డంగా దొరికిపోయి దెబ్బలు తిన్నామని చిరు తెలిపారు. 

నాన్నగారు మమ్మల్ని ఎప్పుడు సినిమాకు తీసుకెళ్లినా కుర్చీకి తీసుకెళ్లేవారు. అయితే రాము సినిమా కోసం మేము మాత్రం నేల టికెట్ తీసుకొని సినిమా హాలులోకి వెళ్లబోతుండగా ట్విస్ట్. అప్పటికే ఓ షో ముగియడంతో అమ్మానాన్నా ఆ సినిమా చూసి బయటకొస్తూ మమ్మల్ని చూశారు.

అంతే.. నాగబాబు బిక్కముఖం వేశాడు. వాడికి ఒళ్ళంతా చెమట పట్టింది. ఇక ఇంటికి తీసుకెళ్లి కొబ్బరి మట్ట తీసుకొని చితకబాదారు నాన్న. రోడ్డుపై ఉరికించి కొట్టారు. అంత చిన్నవాడిని (నాగబాబు) తీసుకొని సినిమాకు వెళ్లడం, పైగా నేల టికెట్ తీసుకోవడం ఏంటి? వాడిని తొక్కేస్తే ఎలా అంటూ నా మీద కోపగించుకున్నారు అని చిరంజీవి చెప్పారు. ప్రస్తుతం ఈ కామెంట్స్ నెట్టింట వైరల్ అవుతున్నాయి.