వెండితెరపై కనిపించనున్న మాజీ ఎమ్మెల్యే జగ్గారెడ్డి

తెలంగాణ రాష్ట్ర కాంగ్రెస్ ఫైర్ బ్రాండ్, టీపీసీసీ వర్కింగ్ ప్రెసిడెంట్, మాజీ ఎమ్మెల్యే తూర్పు జయప్రకాష్ రెడ్డి అలియాస్ జగ్గారెడ్డి వెండితెరపై కనిపించనున్నారు. "ఏ వార్ ఆఫ్ లవ్" అనే చిత్రంలో ఆయన ప్రత్యేక పాత్రను పోషిస్తున్నారు. ఈ విషయాన్ని ఆయన స్వయంగా వెల్లడించారు. ఈ చిత్రానికి వడ్డి రామానుజం దర్శకత్వం వహిస్తున్నారు. ఇందులో తాను నిజ జీవిత పాత్రనే పోషిస్తున్నట్టు జగ్గారెడ్డి వెల్లడించారు. 

"జగ్గారెడ్డి - ఏ వార్ ఆఫ్ లవ్" చిత్రం వచ్చే యేడాది ఉగాదికి విడుదల చేస్తామని ఆయన వెల్లడించారు. ఇందులో తన పాత్ర విరామ సమయానికి ముందు వచ్చి సినిమా పూర్తయ్యేంత వరకు ఉంటుందని తెలిపారు. ఈ చిత్రంలో నటించేందుకు ముఖ్యమంత్రి రేవంత్ రెడ్డి అనుమతి కూడా తీసుకున్నట్టు చెప్పారు. ఈ మూవీకి సంబంధించిన పోస్టర్లను కూడా ఆయన రిలీజ్ చేయగా, ఇందులో జగ్గారెడ్డి వైలెంట్ పాత్రలో కనిపిస్తున్నారు. దీంతో జగ్గారెడ్డి వెండితెర ప్రవేశం  ఇపుడు చిత్రపరిశ్రమలో హాట్‌టాపిక్‌గా మారింది.