ఎంటర్టైన్మెంట్ రంగానికి ఉజ్వల భవిష్యత్తు, యూట్యూబ్ ఛానళ్లకు పెరుగుతున్న ప్రేక్షకాదరణ

ఎంటర్టైన్మెంట్ రంగానికి ఉజ్వల భవిష్యత్తు ఉందని ప్రముఖ బాలీవుడ్ హీరోయిన్ పూజా ప్రజాపతి అన్నారు. బాలివుడ్లో రోమీ, ట్రిప్ టు బ్యాచిలర్ పార్టీ, గ్రీన్ ఫోర్స్, గుజరాతీలో ఆషికి చిత్రాలతో పాటు టాలీవుడ్‌లో మూర్ఖుడు సినిమాతో ప్రేక్షకులను అలరించిన పూజా ప్రజాపతి.. సోమాజిగూడ ప్రెస్ క్లబ్‌లో మంగళవారం జరిగిన ప్రజ్ఞ మీడియా యూట్యూబ్ ఛానల్ ఆవిష్కరణ కార్యక్రమానికి ముఖ్య అతిధిగా హాజరయ్యారు. ఈ వేడుకల్లో భాగంగా ప్రజ్ఞ మీడియా నూతన సంవత్సర క్యాలెండరును ఆవిష్కరించి, సంక్రాంతి సంబరాలను అంగరంగ వైభవంగా నిర్వహించారు.

కేక్ కట్ చేసిన అనంతరం హీరోయిన్ పూజా ప్రజాపతి మీడియాతో మాట్లాడుతూ... ప్రపంచవ్యాప్తంగా ఎంటర్టైన్మెంట్ రంగం గణనీయమైన వృద్ధిని సాధిస్తోందని అన్నారు. యూట్యూబ్ ఛానళ్లకు రోజురోజుకూ ప్రేక్షకాదరణ పెరుగుతోందని, అత్యున్నత నిర్మాణ విలువలతో వినూత్నమైన కార్యక్రమాలను అందించడం ద్వారా యూట్యూబ్ చానళ్లు ప్రేక్షకుల ఆదరాభిమానాలను పొందవచ్చని పేర్కొన్నారు. రియల్ ఎస్టేట్ రంగంలో ప్రతిష్టాత్మక సంస్థగా పేరొందిన ప్రజ్ఞ గ్రూప్ ద్వారా ఆవిష్కరింపబడిన ప్రజ్ఞ మీడియా అనతికాలంలోనే అగ్రగామి ఎంటర్టైన్మెంట్ ఛానల్‌గా నిలుస్తుందని పూజా ప్రజాపతి విశ్వాసం వ్యక్తం చేశారు. 

అనంతరం ప్రజ్ఞ మీడియా మేనేజింగ్ డైరక్టర్ సాయినేని లోకేష్ మీడియాతో మాట్లాడుతూ, ఎంటర్టైన్మెంట్ రంగంలో నూతన ఒరవడిని సృష్టించేలా తమ యూట్యూబ్ ఛానల్‌ను తీర్చిదిద్దామని అన్నారు. అద్భుతమైన నాణ్యతతో, వినూత్నమైన కార్యక్రమాలను అందించడానికి ప్రజ మీడియా సిద్ధంగా ఉందని ఆయన తెలిపారు. వినోదంతో పాటు విజ్ఞానాన్ని అందించే కార్యక్రమాలను రూపొందించామని చెప్పారు. ఎంటర్టైన్మెంట్, సినిమా, స్పోర్ట్స్, పాలిటిక్స్, కరెంట్ ఎఫైర్స్, హెల్త్, ఫిట్నెస్, లైఫ్ స్టైల్, బ్యూటీ టిప్స్, బిజినెస్, కల్చర్, స్పిరిచ్యువల్ తదితర విభాగాలకు సంబంధించిన విభిన్న కార్యక్రమాలను ఆసక్తిదాయకంగా ప్రేక్షకులకు అందిస్తామని వివరించారు.

ప్రజ్ఞా మీడియా చీఫ్ ఎడ్వైజర్లు చెరుకూరి రవిశంకర్, పీవీఎస్ వర్మ ఈ సందర్భంగా మాట్లాడుతూ, ప్రజ్ఞ మీడియా యూట్యూబ్ ఛానల్ ద్వారా సరికొత్త ఎంటర్టైన్మెంట్ ప్రపంచాన్ని ఆవిష్కరిస్తున్నామని అన్నారు. రియల్ ఎస్టేట్ రంగంలో ఏడేళ్ల అనుభవంలో ప్రజాభిమానాన్ని చూరగొన్న ప్రజ్ఞ గ్రూప్, మీడియా రంగంలోనూ విశిష్టతను చాటుకుంటుందని చెరుకూరి రవిశంకర్, వీవీఎస్ వర్మ పేర్కొన్నారు.