తిరుపతి, కాణిపాకం దర్శనాలకు వెళ్లే భక్తులు తప్పనిసరిగా వెల్లూరు గోల్డెన్ టెంపుల్‌లోని వినాయకుడిని పూజించడం చేస్తారు. ఈ ఆలయంలో బంగారు లక్ష్మీదేవి విగ్రహంతో పాటు.. ప్రపంచంలోనే అతిపెద్ద 1,700 కిలోల వెండి శ్రీ శక్తి గణపతి విగ్రహం ప్రత్యేక ఆకర్షణగా నిలుస్తోంది.
2021 జనవరి 25వ తేదీన ఈ విగ్రహాన్ని ప్రతిష్టించారు. తాజాగా ఈ శక్తి గణపతి విగ్రహానికి అలంకరించిన కిరీటం అరుదైన రికార్డును సాధించింది. ఈ కిరీటంలో అరుదైన వైఢూర్యాన్ని పొదిగించారు. ఇది ప్రపంచంలోనే అతిపెద్ద వైఢూర్యంగా రికార్డ్ సృష్టించింది. ఈ వజ్రం 880 క్యారెట్ల బరువు కలిగివుంది.
ఇప్పటివరకూ ప్రపంచ రికార్డులో నిలిచిన అతిపెద్ద వైఢూర్యం బరువు 700 క్యారెట్లు మాత్రమే కావడం గమనార్హం. సహజంగా నవరత్నాలకు ప్రత్యేక శక్తిని కలిగివుంటాయి. తొమ్మిది గ్రహాలలోని శక్తులు అక్కడ ప్రసరింపజేస్తాయని ఆధ్యాత్మిక పండితులు అంటున్నారు.
ఆ విధంగా నవరత్నాలలో ఒకటైన వైఢూర్యం కేతు భగవానునికి ప్రతీక. ఆయన శక్తిని అక్కడ ప్రసరింపజేస్తుందని కిరీటం ఏర్పాటు సందర్భంగా పండితులు స్పష్టం చేశారు. ఎంతో విలువైన వైఢూర్యాలను కొనుగోలు చేసి ధరించలేని భక్తులు ఈ గణనాథుడిని దర్శించుకుని ఆశీర్వాదం పొందవచ్చునని శ్రీ శక్తి అమ్మ తెలిపారు.