టిక్ టాక్ పిచ్చి గురించి వేరే చెప్పక్కర్లేదు. పిచ్చిపిచ్చి చేష్టలతో ఏవేవో పాటలు జత చేసి వెర్రిమొర్రి వేషాలు వేస్తూ చాలామందిని ఇబ్బందులు పాల్జేసింది ఈ టిక్ టాక్. అంతేకాదు.. ఎందరో ప్రాణాలు పోయేందుకు కారణం కూడా అయింది. ఇలాంటి టిక్ టాక్ మరోసారి రెండు కుటుంబాలను బజారుపాల్జేసింది.
ఏం జరిగిందంటే... రాజస్థాన్ రాజధాని జైపూర్‌లోని ఓ బస్తీలో ఓ టీనేజర్ తన స్నేహితురాలైన 14 ఏళ్ల అమ్మాయితో టిక్ టాక్ వీడియో తీసి దాన్ని నెట్లో పెట్టాడు. అది కాస్తా వైరల్ అయ్యింది. ఆ వీడియోను చూసిన బాలిక సోదరుడు తన చెల్లెలితో వీడియోలో వున్న కుర్రాడిని చితకబాదాడు. తన సోదరి వ్యవహారాన్ని తల్లిదండ్రులతో చెప్పడంతో ఆమెను వారు చావ బాదారు.
ఆ తర్వాత బాలికతో టిక్ టాక్ వీడియో చేసిన యువకుడిని మరోసారి చితక్కొట్టి అతడు దుస్తులన్నీ తీసేసి నగ్నంగా వీధుల్లో నడిపించారు. ఆ వీడియోను సోషల్ మీడియాలో పోస్టు చేశారు. దీనిపై అతడి తల్లిదండ్రులు పోలీసులకి ఫిర్యాదు చేయగా, తమ కుమార్తె యువకుడు ప్రవర్తించిన తీరుపై బాలిక తల్లిదండ్రులు కేసు పెట్టారు. దీనితో ఇరు కుటుంబాలను పోలీసులు అదుపులోకి తీసుకున్నారు.