ఉత్తరప్రదేశ్ రాష్ట్ర మాజీ ముఖ్యమంత్రి కళ్యాణ్ సింగ్ ఆరోగ్యం అత్యంత విషమంగా మారింది. దీంతో 89 యేళ్ళ కళ్యాణ్ సింగ్‌కు ఆస్పత్రిలో వెంటిలేటర్‌పై చికిత్స అందిస్తున్నారు.
గత కొంతకాలంగా అనారోగ్యంతో బాధపడుతూ వచ్చిన కళ్యాణ్ సింగ్‌కు మంగళవారం సాయంత్రం నుంచి ఆయ‌న‌ను లైఫ్ సేవింగ్ సపోర్ట్‌పై ఉంచామ‌ని వైద్యులు ప్ర‌క‌టించారు. సీనియర్ వైద్యుల బృందం ఆయన ఆరోగ్య ప‌రిస్థితిని పర్యవేక్షిస్తోందని తెలిపారు.
ప్రస్తుతం ఆయన ఆరోగ్య పరిస్థితి ఏమాత్రం బాగోలేదని వైద్యులు వెల్లడించారు. ఈ నెల 4వ తేదీ నుంచి ఆయన ల‌క్నోలోని సంజయ్ గాంధీ పోస్ట్‌ గ్రాడ్యుయేట్ ఇన్‌స్టిట్యూట్‌ ఆఫ్‌ మెడికల్‌ సైన్సెస్ ఆసుప‌త్రిలో చికిత్స తీసుకుంటున్నారు.
ఇటీవ‌లే ఆసుప‌త్రికి వెళ్లిన ప‌లువురు నేత‌లు ఆయ‌న‌ను ప‌రామ‌ర్శించి ఆయన ఆరోగ్య పరిస్థితి గురించి అడిగి తెలుసుకున్నారు. క‌ల్యాణ్ సింగ్‌కు హృద్రోగ, న‌రాల వైద్యుల ప‌ర్య‌వేక్ష‌ణ‌లో చికిత్స అందిస్తున్నారు.
కాగా, కళ్యాణ్ సింగ్ ఆరోగ్యం అత్యంత విషమంగా ఉందని ఆస్పత్రి వైద్యులు ప్రకటించిన వెంటనే ఉత్తరప్రదేశ్ రాష్ట్ర ముఖ్యమంత్రి యోగి ఆదిత్యనాథ్ ఆస్పత్రికి వెళ్లి కళ్యాణ్ సింగ్ ఆరోగ్య పరిస్థితి గురించి తెలుసుకున్నారు.