గూగుల్ మ్యాప్స్‌లో కొత్త ఫీచర్.. ఏంటది..?

గూగుల్ మ్యాప్స్‌లో మరో కొత్త ఫీచర్ జత అయ్యింది. యూజర్లు ఇంతకు ముందు సందర్శించిన ప్రదేశాలకు సులభంగా నావిగేట్ చెయ్యడానికి గూగుల్ మ్యాప్స్ త్వరలో కొత్తగా 'గో' టాబ్‌ను తీసుకురానుంది. ప్రస్తుతం ఉన్న ఎక్స్‌ప్లోర్, సేవ్డ్‌ ట్యాబ్స్‌ ఫీచర్‌ స్థానంలో ఇక మీదట గో ట్యాబ్ అందుబాటులోకి రానుంది.

ఈ ఫీచర్ రాబోయే కొన్ని వారాల్లో ఆండ్రాయిడ్, ఐఓస్ వినియోగదారులకు అందుబాటులోకి వస్తుంది. గూగుల్ మ్యాప్ ఎప్పటికప్పుడు అప్డేట్ అవుతూ.. సరికొత్త ఫీచర్లను తీసుకుని వస్తూ ఉంది. స్ట్రీట్ వ్యూ, కమ్యూనిటీ ఫీడ్ వంటి ఫీచర్లను ఇటీవలే తీసుకుని వచ్చిన సంగతి తెలిసిందే. 

తాజా ''గో'' టాబ్‌ ఫీచర్ ద్వారా మనం తరుచుగా వెళ్లే షాపింగ్ మాల్స్, స్కూల్స్, జిమ్ వంటి ప్రదేశాలను పిన్ చేసుకోవచ్చు. దారిలో ఎంత ట్రాఫిక్ ఉంది, ఎంత సమయం పడుతుంది వంటి విషయాలను సులభంగా తెలుసుకోవచ్చు. 

గూగుల్ మ్యాప్స్‌లో ఇల్లు, పనిచేసే ప్రదేశాలను మాత్రమే సేవ్ చేసుకోవడానికి అనుమతి ఉంది. ఈ కొత్త ఫీచర్ ద్వారా మనం తరుచుగా వెళ్లే ప్రదేశాలను జోడించుకోవచ్చు. ప్రతిసారి ఈ ప్రదేశాల కోసం సెర్చ్ చేయకుండా.. ఈ ఫీచర్ ద్వారా మన వ్యక్తిగత వాహనాలలో, ప్రజా రవాణాలలో ప్రయాణం చేసినప్పుడు ఏ రూట్‌లో ప్రయాణిస్తే తొందరగా గమ్యానికి చేరుకుంటామో తెలుసుకునేలా ఉంటుంది.