కరోనా వైరస్ మహమ్మారి కారణంగా నిలిచిపోయిన అంతర్జాతీయ విమాన సర్వీసులను వచ్చే నెల 15వ తేదీ నుంచి పునరుద్ధరించాలని కేంద్ర పౌరవిమానయాన మంత్రిత్వ శాఖ నిర్ణయించింది. దీంతో 14 దేశాలకు విమాన సర్వీసులను పరిమిత సంఖ్యలో నడుపనున్నారు. ఈ మేరకు శుక్రవారం ఆదేశాలు జారీచేసింది.
డిసెంబరు 15వ తేదీ నుంచి షెడ్యూల్డ్ అంతర్జాతీయ విమాన సర్వీసులను నడిపేందుకు అవసరమైన అన్ని రకాల చర్యలు తీసుకోవాల్సిందిగా డైరెక్టర్ జనరల్ ఆఫ్ సివిల్ ఏవియేషన్ (డీజీసీఏ)కు లేఖ రాసింది. దీంతో ఈ సర్వీసుల పునఃప్రారంభంపై డీజీసీఏ నోటిఫికేషన్ జారీచేసింది.
అయితే, డిసెంబరు 15 నుంచి అంతర్జాతీయ విమాన సర్వీసులను పునరుద్ధరించినప్పటికీ.. తొలుత కరోనా ముప్పు లేని దేశాలకు మాత్రమే నడుపనున్నారు. ఈ దేశాల జాబితాలో బ్రిటన్, సింగపూర్, చైనా, బ్రెజిల్, బంగ్లాదేశ్, మారిషెస్, జింబాబ్వే, న్యూజిలాండ్ దేశాలు ఉన్నాయి. తర్వాత దశల వారీగా ఇతర దేశాలకు నడిచే సర్వీసులను పునరుద్ధరించే వీలుంటుంది.