నా అనుభవమంత లేదు నీ వయస్సు.. విర్రవీగడం కరెక్టు కాదు : జగన్‌కు బాబు కౌంటర్

నా అనుభవమంత లేదు నీ వయస్సు లేదంటూ ముఖ్యమంత్రి వైఎస్. జగన్ మోహన్ రెడ్డికి టీడీపీ అధినేత, ప్రతిపక్ష నేత చంద్రబాబు నాయుడు కౌంటరిచ్చారు. తెలంగాణ రాష్ట్రంలో కాళేశ్వరం ప్రాజెక్టును నిర్మిస్తున్న సమయంలో చంద్రబాబు గాడిదలు కాస్తున్నారా అంటూ జగన్ అన్నారు.

దీనిపై చంద్రబాబు తీవ్ర అభ్యంతరం తెలుపుతూ మాట్లాడారు.. అధికారం ఉందని విర్రవీగడం కరెక్ట్ కాదన్నారు. బాబ్లీ ప్రాజెక్ట్‌కు వ్యతిరేకంగా పోరాడామని చెప్పుకొచ్చారు. నీటి పంపకాలు సున్నితమైన అంశమని.. నీటి సమస్యలపై మేం గతంలో పోరాడామని వెల్లడించారు. 

జగన్ వయసు.. నా రాజకీయ అనుభవంతనన్న చంద్రబాబు భావితరాల భవిష్యత్‌ను తాకట్టుపెట్టే అధికారం మీకు లేదంటూ ఫైర్ అయ్యారు. ఐదు కోట్ల మంది మీ నిర్ణయాలను చూస్తున్నారని ఈ సందర్భంగా పేర్కొన్నారు. కాళేశ్వరం ప్రాజెక్ట్ వస్తే ఏపీ, తెలంగాణ రాష్ట్రాలు.. భారత్, పాక్‌లా తయారవుతాయని గతంలో అన్న జగన్.. ఆ ప్రాజెక్ట్ ప్రారంభోత్సవానికి ఎలా వెళ్లారంటూ జగన్‌ను చంద్రబాబు నిలదీశారు. 

అంతకుముందు.. ఏపీ బడ్జెట్ సమావేశాల్లో సీఎం జగన్ ప్రసంగిస్తూ, ఐదేళ్ల కాలంలో చంద్రబాబు చేసిందేమి లేదని ఆరోపించారు. చంద్రబాబు అధికారంలో ఉన్నప్పుడే తెలంగాణలో కాళేశ్వరం ప్రాజెక్టు కట్టారన్నారు. మరి ఆ సమయంలో చంద్రబాబు ఇక్కడేం గాడిదలు కాశారని విమర్శలు చేశారు. 

అసలు చంద్రబాబు హయాంలో ఒక్క ప్రాజెక్టు అయినా పూర్తయిందా అని జగన్ ప్రశ్నించారు. రెండు రాష్ట్రాల మధ్య సఖ్యత ఉన్నందుకు సంతోషించాలన్నారు. రెండు రాష్ట్రాల సీఎంలు కలిసి పనిచేసినప్పుడే అభివృద్ధి సాధ్యం అవుతుందని చెప్పారు. దీనికి చంద్రబాబు అధికారం ఉంది కదా అని విర్రవీగొద్దంటూ కౌంటర్ ఇచ్చారు.