ఆంధ్రప్రదేశ్ రాష్ట్ర సంక్షేమ శాఖ మంత్రి సవిత ఆర్టీసీ బస్సు నడిపిన ప్రతి ఒక్కరినీ ఆశ్చర్యపరిచారు. దీంతో అటు ఆర్టీసీ అధికారులతో పాటు పార్టీ శ్రేణులను ఆశ్చర్యానికి గురిచేశాయి. సత్యసాయి జిల్లా పెనుకొండ ఆర్టీసీ డిపోకు నూతనంగా రెండు బస్సులు మంజూరు అయ్యాయి, ఈ నేపథ్యంలో సోమవారం పెనుకొండ బస్టాండ్‌‍లో నూతనంగా మంజూరైన రెండు ఆర్టీసీ బస్సులను మంత్రి సవిత ప్రారంభించారు. ఈ సందర్భంగా మంత్రి స్వయంగా ఓ బస్సు ట్రైల్ రన్ చేశారు. మంత్రి సవిత స్టీరింగ్ పట్టుకుని బస్సు నడపడంతో ఆర్టీసీ అధికారులు, సిబ్బంది, పార్టీ శ్రేణులు ఆశ్చర్యానికి గురయ్యారు.
అనంతరం మంత్రి సవిత మీడియాతో మాట్లాడుతూ, గత వైకాపా ప్రభుత్వం పదివేల కోట్లు అప్పు చేసినా మౌలిక వసతుల కల్పనకు ఒక్క రూపాయి కూడా ఖర్చు చేయలేదని విమర్శించారు. కొత్త బస్సులను గత ప్రభుత్వంలో కొనుగోలు చేయలేదన్నారు. కూటమి ప్రభుత్వం అధికారంలోకి వచ్చిన తర్వాత 400 బస్సులు కొనుగోలు చేయడం జరిగిందని తెలిపారు. ఈ కార్యక్రమంలో ఆర్టీసీ ఆర్ఎం మధుసూధన్, సిబ్బంది, టీడీపీ నేతలు, కార్యకర్తలు పాల్గొన్నారు.