ఆంధ్రప్రదేశ్‌లో ఓటింగ్ శాతం ఎంత? 2,841 అభ్యర్థుల కోసం..?

175 మంది సభ్యుల రాష్ట్ర అసెంబ్లీ, 25 లోక్‌సభ స్థానాలకు ఏకకాల ఎన్నికల కోసం సోమవారం జరిగిన పోలింగ్ తొలి రెండు గంటల్లో ఆంధ్రప్రదేశ్‌లో తొమ్మిది శాతానికి పైగా ఓట్లు పోలయ్యాయి. ఎన్నికల సంఘం ప్రకారం, లోక్‌సభ నియోజకవర్గాల్లో ఉదయం 9 గంటల వరకు 9.05 శాతం పోలింగ్ నమోదైంది, అసెంబ్లీ ఎన్నికలలో 9.21 శాతం పోలింగ్ నమోదైంది. 

46,389 కేంద్రాల్లో 4.14 కోట్ల మంది ఓటర్లు తమ ఓటు హక్కును వినియోగించుకున్నారు. 2,841 మంది అభ్యర్థుల రాజకీయ అదృష్టాన్ని వీరు నిర్ణయించనున్నారు. 169 అసెంబ్లీ సెగ్మెంట్లలో సాయంత్రం 6 గంటల వరకు పోలింగ్ జరగనుంది. 

అరకు, పాడేరు, రంపచోడవరంలోని వామపక్ష తీవ్రవాద (ఎల్‌డబ్ల్యుఇ) ప్రభావిత సెగ్మెంట్లలో పోలింగ్ సాయంత్రం 4 గంటలకు ముగుస్తుంది. పాలకొండ, కురుపాం, సాలూరులోని మూడు ఇతర ప్రభావిత సెగ్మెంట్లలో ఇది సాయంత్రం 5 గంటలకు ముగుస్తుంది. 

2019 ఎన్నికల్లో రాష్ట్రంలో 79.84 శాతం పోలింగ్ నమోదైంది. ముఖ్యమంత్రి, వైఎస్ఆర్ కాంగ్రెస్ పార్టీ అధ్యక్షుడు వైఎస్. జగన్ మోహన్ రెడ్డి, మాజీ ముఖ్యమంత్రి, తెలుగుదేశం పార్టీ (టిడిపి) అధినేత ఎన్. చంద్రబాబు నాయుడు, జనసేన అధినేత, నటుడు పవన్ కళ్యాణ్ 175 అసెంబ్లీ స్థానాలకు 2,387 మంది అభ్యర్థుల్లో ఉన్నారు.

25 లోక్‌సభకు 454 మంది పోటీలో ఉన్నారు. వారిలో ప్రముఖులు కేంద్ర మాజీ మంత్రి, రాష్ట్ర బీజేపీ చీఫ్ డి.పురందేశ్వరి, రాష్ట్ర కాంగ్రెస్ అధ్యక్షుడు వై.ఎస్. షర్మిలారెడ్డి, మాజీ ముఖ్యమంత్రి ఎన్.కిరణ్ కుమార్ రెడ్డిలు కూడా వుండటం గమనార్హం.