నా ఇంటి ఎదురుగా సీసీ కెమేరా...కాకినాడ మేయ‌ర్ పావ‌ని అస‌హ‌నం

కాకినాడ నగరపాలక సంస్థ మేయర్ పదవికి తాను రాజీనామా చేయనని, అవిశ్వాసం ఎదుర్కొనేందుకు సిద్ధంగా ఉన్నట్లు మేయర్ సుంకర పావని తెలిపారు. తన ఇంటి ఎదురుగా వ్యక్తిగత  స్వేచ్ఛను హరించే సీసీ కెమెరా ఏర్పాటు చేయడం పట్ల పావని అసహనం వ్యక్తం చేశారు.

మేయర్ పావని తన ఇంట్లో విలేకరులతో సమావేశం ఏర్పాటు చేశారు. ఈ సందర్భంగా ఆమె మాట్లాడుతూ, నగరంలో ఎన్నో స్లమ్ ఏరియాలు ఉన్నాయని అటువంటి చోట్ల ఏర్పాటు చేయకుండా, సీసీ కెమెరాను తాను ఉంటున్న ఇంటికి ఎదురుగా వేయించడం తన వ్యక్తిగత స్వేచ్ఛను హరించడమేనన్నారు. తనను రెండేళ్ల నుండి స్థానిక ప్రజా ప్రతినిధి ఎన్నో రకాలుగా వేధింపులకు గురి చేస్తున్నారంటూ పరోక్షంగా సిటీ ఎమ్మెల్యే పేరు చెప్పకుండా వివరించారు.

గత నెల రోజులుగా త‌నపై వేధింపులు పెరిగాయని, మహిళా అని చూడకుండా ఆ ప్రజా ప్రతినిధి సీసీ కెమెరాలు ఏర్పాటు చేయించడం పట్ల పోలీస్ స్టేషన్లో ఫిర్యాదు చేస్తానన్నారు. తనకు ప్రజాధారణ అధికంగా ఉందని, ఈ విషయం అవిశ్వాస పరీక్షలలో  తెలుస్తుందన్నారు. అనంతరం ఆమె త‌న ఇంటి ఎదురుగా ఏర్పాటు చేసిన సీసీ కెమెరాను విలేఖర్లకు చూపించారు.