స్పైస్ జెట్‌ ఫ్లైట్‌ను గగనంలో నిలువరించిన పాక్ ఎఫ్-16.. భీతావహులైన ప్రయాణికులు

స్పైస్ జెట్ విమానాన్ని పాకిస్థాన్ యుద్ధ విమానాలు వెంటాడాయి. దీంతో విమాన ప్రయాణికులు భయంతో వణికిపోయారు. ఈ ఘటన గురువారం జరిగింది. ఢిల్లీ నుంచి ఆప్ఘనిస్థాన్‌కు బయలుదేరిన స్పైస్ జెట్ విమానానికి ఈ పరిస్థతి ఏదురైంది. ఈ వివరాలను పరిశీలిస్తే, 

ఢిల్లీ నుంచి కాబూల్‌కు స్పైస్ జెట్ విమానం ఒకటి బయలుదేరింది. ఈ విమానాన్ని పాకిస్థాన్ ఎయిర్ ఫోర్స్‌కు చెందిన ఎఫ్-16 యుద్ధ విమానాలు చుట్టుముట్టి గగనంలోనే అడ్డుకున్నాయి. బాలాకోట్ వైమానిక దాడుల తర్వాత తన గగనతలాన్ని మూసివేసిన పాక్ ఇటీవలే తెరిచింది. ఈ క్రమంలో స్పైస్ జెట్ విమానం ప్రయాణిస్తుండగా దాన్ని భారత యుద్ధ విమానంగా పొరబడిన పాక్ వాయుసేన వెంటనే స్పందించింది. 

"పాక్ వాయుసేనకు చెందిన ఎఫ్-16 యుద్ధ విమానాలు ఆ స్పైస్ జెట్ విమానాన్ని చుట్టుముట్టాయి. ఎత్తు తగ్గించాల్సిందిగా స్పైస్ జెట్ పైలెట్‌కు ఓ పాక్ ఫైటర్ పైలెట్ చేతితో సంజ్ఞలు చేసినట్టు విమాన ప్రయాణికులు తెలిపారు. ఆపై పైలెట్‌తో రేడియో ద్వారా సంభాషించి అది ప్రయాణికుల విమానం అని పాక్ పైలెట్లు తెలుసుకున్నారు. ఆ విమానం పాక్-ఆఫ్ఘన్ సరిహద్దులు దాటిన తర్వాతే పాక్ ఎఫ్-16లు వెనుదిరిగాయి. ఉన్నట్టుండి గాల్లో యుద్ధ విమానాలు రౌండప్ చేయడంతో స్పైస్ జెట్ ప్రయాణికులు భీతావహులైపోయారు

మరోవైపు, విమానం కాబూల్ చేరిన తర్వాత పాకిస్థాన్ రాయబార కార్యాలయం వివరణ ఇచ్చింది. ఈ ప్రక్రియ ముగిసిన అనంతరం స్పైస్ జెట్ విమానం ఢిల్లీకి ఐదు గంటలు ఆలస్యంగా బయల్దేరింది. వాస్తవానికి ప్రతి విమానంపైనా అది ఏ తరహా విమానమో కోడ్ భాషలో రాసి ఉంటుంది. దీన్ని పాక్ వాయుసేన అర్థం చేసుకోవడంలో పొరబడిన కారణంగానే గగనతలంలో ఈ తప్పు జరిగినట్టు వివరించింది.