కాన్పూర్ ఎన్కౌంటర్ కేసు ప్రధాన సూత్రధారిగా భావిస్తున్న గ్యాంగ్స్టర్ వికాస్ దూబేను మధ్యప్రదేశ్ రాష్ట్ర పోలీసులు ఎట్టకేలకు అరెస్టు చేశారు. ఉజ్జెయినిలోని మహాకాళ్ ఆలయానికి వచ్చిన వికాస్ దూబేను అక్కడ విధుల్లో ఉన్న భద్రతా సిబ్బంది గుర్తించి పోలీసులకు సమాచారం ఇచ్చారు. ఆ తర్వాత ఉజ్జెయిని పోలీసులు అక్కడకు చేరుకుని వికాస్ దూబేను అరెస్టు చేశాయి.కాగా, ఉత్త‌ర‌ప్ర‌దేశ్‌కు చెందిన గ్యాంగ్స్టర్ వికాస్ దూబే త‌ల‌పై 5 ల‌క్ష‌ల రూపాయల రివార్డు ఉన్న విషయం తెల్సిందే.
మ‌ధ్య‌ప్ర‌దేశ్‌లోని ఉజ్జెయినిలో మ‌హాకాళేశ్వ‌రుడికి పూజ‌లు నిర్వ‌హించేందుకు వికాస్ రాగా, ఈ ఆలయంలో ప‌నిచేస్తున్న ఓ గార్డు అత‌న్ని నిర్బంధించిన‌ట్లు తెలుస్తోంది. వికాస్‌ను పట్టుకున్న ఆల‌య గార్డు.. ఆ విష‌యాన్ని ఉజ్జెయిన్ ఎస్పీ మ‌నోజ్ సింగ్‌కు తెలియ‌జేశాడు.
ఆ తర్వాత ఉజ్జెయిని పోలీసులు అత‌న్ని అదుపులోకి తీసుకున్నారు. మధ్యప్రదేశ్ సీఎం శివ‌రాజ్ సింగ్ చౌహాన్‌కు ఆ రాష్ట్ర డీజీపీ ఈ విష‌యాన్ని తెలియ‌జేశారు. దూబే అరెస్టు గురించి యూపీ సీఎం యోగికి శివ‌రాజ్ చెప్పిన‌ట్లు సమాచారం.
గ‌త వారం కాన్పూర్‌లో జ‌రిగిన ఎన్‌కౌంట‌ర్‌లో 8 మంది పోలీసులు మృతిచెందిన విషయం తెలిసిందే. ఆ కేసులో వికాస్ ప్రధాన సూత్రధారి. వికాస్ కోసం గ‌త అయిదు రోజుల నుంచి యూపీ పోలీసులు విస్తృతంగా గాలిస్తున్నారు.
ఇప్ప‌టికే ఈ కేసుతో లింకు ఉన్న న‌లుగురు నేరగాళ్లను పోలీసులు ఎన్కౌంటర్ చేశారు. కాన్పూర్‌లోని త‌న స్వంత ఇంటి నుంచి త‌ప్పించుకున్న వికాస్ ఆ తర్వాత పోలీసులకు ముచ్చెమ‌ట‌లు ప‌ట్టిస్తూ వారికి చిక్కకుండా తప్పించుకుని తిరుగుతున్న విషయం తెల్సిందే.