పవర్ స్టార్ పవన్ కళ్యాణ్ నటిస్తున్న తాజా చిత్రం వకీల్ సాబ్. ఈ చిత్రం బాలీవుడ్ సినిమా పింక్‌కు రీమేక్. వేణు శ్రీరామ్ దర్శకత్వం వహిస్తున్న ఈ సినిమాను ప్రముఖ నిర్మాతలైన దిల్ రాజు, బోనీ కపూర్‌లు కలిసి నటిస్తున్నారు. ఈ చిత్రం షూటింగ్ సింహ భాగం పూర్తి చేసుకుంది. కరోనా మహమ్మారి వెలుగు చూడకుంటే ఈ చిత్రం షూటింగ్ పూర్తి చేసుకుని ఆగస్టులో ప్రేక్షకుల ముందుకురావాల్సివుంది.
కానీ, కరోనా లాక్డౌన్ కారణంగా చిత్రం షూటింగ్ గత నాలుగు నెలలుగా ఆగిపోయింది. ఈ క్రమంలో ఈ చిత్రం కోసం హీరోయిన్‌ను ఇంకా ఎంపిక చేయలేదు. ఇపుడు శృతిహాసన్ పేరు తెరపైకి వచ్చింది. గతంలో వీరిద్దరూ కలిసి నటించిన చిత్రాల్లో గబ్బర్ సింగ్ బాక్సాఫీస్ రికార్డులను తిరగరాసింది.
ఇపుడు మరోమారు వకీల్ సాబ్‌తో కలిసి శృతి జతకట్టనుంది. దీనిపై ఈ అమ్మడు స్పందించింది. 'అవును.. నేను 'వకీల్‌సాబ్'లో నటిస్తున్నా. ఆ సినిమాలో నా పాత్ర ఏంటనేది ఇప్పుడే చెప్పలేను. నాకు డ్రీమ్ రోల్స్ అంటూ ఏమీ లేవు. ప్రతినాయిక పాత్ర చేయడానికైనా సిద్ధమే. నేను పూర్తిగా సంగీతంపై దృష్టి పెట్టడానికి చాలా సమయం పడుతుంది. ప్రస్తుతం నటన గురించే ఆలోచిస్తున్నాన' అని చెప్పుకొచ్చింది.