సూపర్ స్టార్ రజనీకాంత్ మీడియాపై అసహనం వ్యక్తం చేశారు. నో పాలిటిక్స్ అంటూ వెళ్లిపోయారు. ఆయన హీరోగా నటించిన తాజా చిత్రం వేట్టయన్. ఈ చిత్రం ఆడియో రిలీజ్ వేడుక శుక్రవారం రాత్రి జరిగింది. ఇందులో పాల్గొనేందుకు ఆయన శుక్రవారం ఉదయం వైజాగ్ నుంచి చెన్నైకు విమానంలో రాగా, ఎయిర్ పోర్టు వద్ద మీడియాతో మాట్లాడారు.
తమిళనాడు ఉప ముఖ్యమంత్రిగా ఉదయనిధి స్టాలిన్ పేరును ముఖ్యమంత్రి పరిశీలిస్తున్నారనే వార్త ప్రచారంలో వుంది.. దీనిపై మీ కామెంట్ ఏమిటి? అని ఓ విలేకరి ప్రశ్నించగా 'పాలిటిక్స్ సంబంధించిన ప్రశ్నలు నన్ను అడగొద్దు, ఇబ్బంది పెట్టొద్దని మీకు ఇంతకు ముందే చెప్పానుగా' అంటూ అసంతృప్తి వ్యక్తం చేస్తూ రజనీకాంత్ అక్కడి నుంచి వెళ్లిపోయారు.
ప్రస్తుతం దీనికి సంబంధించిన ఓ వీడియో సోషల్ మీడియాలో చక్కర్లు కొడుతుంది. డీఎంకే అధినేత తమిళనాడు ముఖ్యమంత్రి ఎం.కె.స్టాలిన్ తన కొడుకు ఉదయనిధి స్టాలిన్‌‍కు ఉప ముఖ్యమంత్రి పదవిని ఇస్తారనే ప్రచారం పార్టీ వర్గాల్లో గత కొంతకాలంగా జరుగుతోంది. ఈ విషయంపై ఉదయనిధి స్టాలిన్ కూడా 'ఇది పూర్తిగా పార్టీ అంతర్గత వ్యవహారం, దీనిపై ముఖ్యమంత్రి మాత్రమే నిర్ణయం తీసుకుంటారు' అని స్పందించారు. ప్రస్తుతం ఉదయనిధి స్టాలిన్ తమిళనాడు ప్రభుత్వంలో క్రీడా శాఖామంత్రిగా ఉన్నారు.