బిగ్ బాస్-2కి వ్యాఖ్యాతగా వ్యవహరిస్తున్న నేచురల్ స్టార్ నాని.. ఓవైపు బుల్లితెరపై కనిపిస్తూనే.. సినిమాలు చేసుకుంటూ పోతున్నాడు. ఇప్పటికే శ్రీరామ్ ఆదిత్య ద‌ర్శ‌క‌త్వంలో నాగార్జున‌తో క‌లిసి మ‌ల్టీ స్టార‌ర్ చేస్తున్నాడు. ఇక ఈ సినిమా త‌ర్వాత ప్ర‌ముఖ చిత్ర నిర్మాణ సంస్థ సితార ఎంట‌ర్‌టైన్‌మెంట్‌లో ''జెర్సీ'' అనే చిత్రం చేయ‌నున్నాడు.
మ‌ళ్ళీ రావా ఫేం గౌత‌మ్ తిన్న‌మూరి ద‌ర్శ‌క‌త్వంలో ఈ చిత్రం రూపొంద‌నుంది. ఇందులో నాని క్రికెట‌ర్‌గా క‌నిపించ‌నున్నాడ‌ని టాక్. ఈ సినిమాలో శృతిహాసన్ హీరోయిన్‌గా నటించనుందని టాక్. ఈ సినిమాలు కాకుండా కొత్త ద‌ర్శ‌కుడితో మ‌రో సినిమా చేయాల‌ని నాని భావించాడ‌ని టాక్ వస్తోంది. దిల్ రాజు నిర్మాణంలో రూపొంద‌నున్న ఈ సినిమాకి ''సభకు నమస్కారం'' అనే టైటిల్ ఫిక్స్ చేసిన‌ట్టు తెలుస్తోంది.
గతంలో నానితో దిల్ రాజు నిర్మించిన నేను లోకల్, మిడిల్ క్లాస్ అబ్బాయి సినిమాలు ఘన విజయాలను సాధించాయి. ప్రస్తుతం ఈ చిత్రం కూడా బంపర్ హిట్ కావడం ఖాయమని తెలుస్తోంది.