గత ఏడాది సెప్టెంబర్‌లో విడుదలైన బాలీవుడ్ సూపర్ స్టార్ షారుఖ్ ఖాన్ బ్లాక్ బస్టర్ "జవాన్" జపాన్‌లో నవంబర్ 29న ప్రేక్షకుల ముందుకు రాబోతోంది. ఈ విషయాన్ని షారుఖ్ గురువారం ఇన్‌స్టాగ్రామ్‌ ద్వారా తెలియజేశాడు. అలాగే నయనతార, విజయ్ సేతుపతి ఉన్న పోస్టర్‌ను పంచుకున్నాడు.
జవాన్ 29 నవంబర్, 2024న జపాన్‌లో తెరపైకి వస్తుంది. అట్లీ దర్శకత్వంలో యాక్షన్ థ్రిల్లర్‌గా జవాన్ తెరకెక్కింది. ఈ సినిమా ద్వారా అట్లీ బాలీవుడ్ ఇండస్ట్రీలోకి అడుగుపెట్టాడు.
సమాజంలో అవినీతిని సరిదిద్దేందుకు జట్టుకట్టే తండ్రీకొడుకులుగా ఈ చిత్రంలో షారూఖ్ ద్విపాత్రాభినయం చేశారు. ఈ చిత్రంలో దీపికా పదుకొణె, ప్రియమణి, సన్యా మల్హోత్రా కూడా నటించారు.
పాతికేళ్ల క్రితం చేసిన వాగ్దానాన్ని నిలబెట్టుకుంటూ, సమాజంలోని తప్పులను సరిదిద్దడానికి వ్యక్తిగత పగతో నడిచే వ్యక్తి చుట్టూ ఈ చిత్రం తిరుగుతుంది. ఈ చిత్రం ఇటీవలే హిందీ చిత్రసీమలో ఒక సంవత్సరం పూర్తి చేసుకున్న సంగతి తెలిసిందే.