"అందాల రాక్షసి" చిత్రంలో విభిన్నమైన రోల్ చేసి నటుడిగా అందరి ప్రశంసలు అందుకున్న నవీన్ చంద్ర ఆ తర్వాత హీరోగా పలు చిత్రాల్లో నటించాడు. అయితే హీరోగా నటించడం అతనికి కలిసి రాలేదు. ఎన్ని సినిమాలు తీసినా ప్రయోజనం లేకపోయింది. దాంతో క్యారెక్టర్ ఆర్టిస్ట్‌గా, విలన్‌గా కూడా ప్రయత్నాలు చేశాడు. అయినా కూడా అతని కెరీర్ పుంజుకోలేదు.
ఆ సమయంలో ఎన్టీఆర్, త్రివిక్రమ్‌ల కాంబినేషన్‌లో వచ్చిన 'అరవింద సమేత' చిత్రంలో విలన్‌గా నటించే అవకాశం దక్కించుకున్నాడు. ఆ సినిమాలో అతని పాత్రకు మంచి గుర్తింపు రావడంతో ప్రశంసలు వెల్లువెత్తాయి. మళ్లీ అతనికి అవకాశాలు రావడం మొదలయ్యాయి.
తాజాగా నవీన్ చంద్ర హీరోగా వేణు మధుకంటి దర్శకత్వంలో ఓ చిత్రం ప్రారంభమైంది. ఈ చిత్ర ప్రారంభోత్సవంలో నవీన్ చంద్ర మాట్లాడుతూ వరుసగా ఫ్లాప్‌లు వచ్చిన సమయంలో ఏం చేయాలో అర్థం కాని పరిస్థితుల్లో ఎన్టీఆర్ మరియు త్రివిక్రమ్ నాకు అరవింద సమేత చిత్రంలో బాలిరెడ్డి పాత్రను ఇచ్చారు. ఆ పాత్రతో మళ్లీ నాకు జీవం వచ్చినట్లయ్యింది.
ఆ సినిమాతో నా కెరీర్ మళ్లీ ప్రారంభం అయినట్లయింది. ఎన్టీఆర్ ఆ సినిమాలో నాకు అవకాశం ఇవ్వకపోయి ఉంటే నా పరిస్థితి ఊహించుకోలేను అన్నాడు. పొలిటికల్ బ్యాక్ డ్రాప్ కథతో నిర్మితమౌతున్న ఈ చిత్రం కథపై నేను దర్శకుడు దాదాపు సంవత్సరం వర్క్ చేశాం. ఇద్దరం కలిసి చాలా రోజులు చర్చలు జరిపి మంచి కథను సిద్ధం చేశాం. ఇది ఒక మంచి చిత్రంగా నిలుస్తుందన్న నమ్మకం నాకుంది అని విశ్వాసం వ్యక్తం చేశారు.