అమితాబ్ జీవితం ఎన్నో బోధిస్తుంది : పవన్ కళ్యాణ్

బాలీవుడ్ సూపర్ స్టార్ అమితాబ్ బచ్చన్ జీవితం మనకు ఎన్నో బోధిస్తుందని, జీవితంలో ఎదుగుతున్న క్ర‌మంలో ఎదుర‌య్యే అస‌మాన‌త‌ల‌ని ఎలా పోరాడాలి అనేది ఆయ‌న జీవితం నేర్పిస్తుంది అని పవర్ స్టార్ పవన్ కళ్యాణ్ అన్నారు. 

టాలీవుడ్ సూపర్ స్టార్ (మెగాస్టార్) చిరంజీవి నటించిన 151వ చిత్రం "సైరా నరసింహా రెడ్డి" విడుదలకు సిద్ధంగా ఉంది. ఈ ప్రతిష్టాత్మక చిత్రం అక్టోబరు రెండో తేదీన ప్రేక్షకుల ముందుకురానుంది. చిరంజీవి ప్ర‌ధాన పాత్ర‌లో సురేంద‌ర్ రెడ్డి తెర‌కెక్కించిన ఈ చిత్రంలో అమితాబ్ రాజ‌గురువు పాత్ర‌ను పోషించారు. 

రామ్ చ‌ర‌ణ్ కొణిదెల ప్రొడ‌క్ష‌న్ బేన‌ర్‌పై మూవీ నిర్మిస్తున్నాడు. కొన్ని రోజుల క్రితం అమితాబ్ టీంతో క‌లిసి షూటింగ్‌లో పాల్గొన్నారు. అదేస‌మయంలో ప‌వ‌న్ క‌ళ్యాణ్ సైరా సెట్‌కి వెళ్ళారు. త‌న అభిమాన న‌టుడు.. అన్న‌య్య సినిమాలో న‌టిస్తున్నార‌ని తెలిసి, బిగ్ బీని క‌లిసేందుకు అక్క‌డికి వెళ్లారు ప‌వ‌న్‌. 

కొద్ది సేపు అమితాబ్ తో ముచ్చ‌టించిన త‌ర్వాత చిరు, అమితాబ్, చెర్రీ, ప‌వ‌న్ క‌ళ్యాణ్ క‌లిసి ఫోటో దిగారు. ఆ ఫోటో అప్ప‌ట్లో వైర‌ల్ కాగా, ప‌వ‌న్ తాజాగా మ‌రోసారి ఆ ఫోటోల‌ని త‌న సోష‌ల్ మీడియా పేజ్ ద్వారా షేర్ చేశాడు. 

'నా జీవితంలో ఆ క్ష‌ణం ఎంతో అపురూపం. నా గురువు, గౌరవప్రదమైన "శ్రీ అమితాబ్ బచ్చన్ జీ"ని సైరా సెట్స్‌లో కలిసాను. అతని జీవితం మనకు ఎన్నో బోధిస్తుంది. జీవితంలో ఎదుగుతున్న క్ర‌మంలో ఎదుర‌య్యే అస‌మాన‌త‌ల‌ని ఎలా పోరాడాలి అనేది ఆయ‌న జీవితం నేర్పిస్తుంది' అని ప‌వ‌న్ పేర్కొన్నారు.