ఏమడిగినా తెలియదంటున్నాడు.. మెగా కాంపౌండ్‌లో మరీ ఇంత అమాయకుడా!

ఈ మధ్యకాలంలో పవన్ కళ్యాణ్, అలీ నడుమ జరిగిన వివాదం గురించి రెండు తెలుగు రాష్ట్రాల్లో అందరికీ తెలిసిందే. రాజకీయ కారణాల వలన వీరి మధ్య రగిలిన చిచ్చు స్నేహితుల మధ్య దూరాన్ని పెంచింది. 'అలీని ఎంతగానో నమ్మాను, సాయం చేశాను, కానీ నాకు నమ్మక ద్రోహం చేశాడు' అంటూ పవన్ కళ్యాణ్ ఆరోపించగా... అలీ కూడా ఏమాత్రం తగ్గకుండా 'మీరు మీ అన్నయ్య చిరంజీవి సాయంతో పైకొచ్చారు... నేను ఎవరి సాయం లేకుండా స్వంతంగా కష్టపడి ఇంత స్థాయికి చేరుకున్నాను, అలాంటిది మీరెప్పుడు నాకు సాయం చేశారు?' అంటూ ఎదురు ప్రశ్నించారు.

తన ఇటీవలి చిత్రం ‘చిత్రలహరి' సినిమా ప్రచారంలో భాగంగా మీడియా ప్రతినిధులు మెగా మేనల్లుడు సాయి ధరమ్ తేజ్‌ను పవన్ కళ్యాణ్- అలీ వివాదం గురించి ప్రశ్నించగా ‘నాకు అసలు గొడవ జరిగినట్లే తెలియదు, నేను ఆ సమయంలో ఇక్కడ లేను. ఏంటో తెలియకుండా మాట్లాడటం కరెక్ట్ కాదు' అంటూ సమాధానం ఇచ్చారు. ఇక మీ పెదమామయ్య నాగబాబు యూట్యూబ్‌లో ‘నా ఛానల్ నా ఇష్టం' ఛానెల్‌లో చేసిన వీడియోలు చూశారా? అని ప్రశ్నించగా... ‘లేదండీ, అలాంటి ఛానెల్ ఉందనే విషయం కూడా నాకు ఇప్పటిదాకా తెలియదు' అంటూ ఇన్నోసెంట్‌గా ఫేస్ పెట్టాడట.

ఇక మీ సినిమా ‘ఇంటిలిజెంట్' టీజర్‌ను బాలకృష్ణ లాంచ్ చేశారు. మీ మధ్య మంచి అనుబంధం కూడా ఉంది. మరి ఇటీవల నాగబాబు బాలకృష్ణను కమెంట్ చేసారు కదా? అనే ప్రశ్నకు ‘హా..చూశాను బట్, ఎందుకో, ఏమో తెలియకుండా మద్దతు తెలపడం, ఖండించడం లాంటివి చేయలేను' అంటూ దాటవేసారు.