7 నుంచి అమెజాన్ ప్రైమ్‌లో "పుష్ప" స్ట్రీమింగ్

ఐకాన్ స్టార్ అల్లు అర్జున్, క్రియేటివ్ డైరెక్టర్ సుకుమార్ కాంబినేషన్‌లో వచ్చిన చిత్రం "పుష్ప". ఈ  చిత్రం గత నెల 17వ తేదీన ప్రపంచ వ్యాప్తంగా విడుదలైన సరికొత్త రికార్డులను నెలకొల్పింది. ఇప్పటికే రూ.300 కోట్ల మేరకు కలెక్షన్లు రాబట్టినట్టు సమాచారం. విడుదలైన తెలుగు, తమిళం, కన్నడ, మలయాళం, హిందీ భాషలన్నింటిలోనూ ఈ చిత్రం సంచలన విజయాన్ని నమోదు చేసి కనకవర్షం కురిపిస్తుంది. 

ఈ క్రమంలో ఈ నెల 7వ తేదీన అమెజాన్ ప్రైమ్ ఓటీటీలో ఈ చిత్రం విడుదలకానుంది. ఈ నెల 7వ తేదీన విడుదల కావాల్సిన "ఆర్ఆర్ఆర్" వివిధ కారణాలతో వాయిదాపడిన విషయం తెల్సిందే. దీన్ని క్యాష్ చేసుకునేందుకు వీలుగా ఈ నెల 7వ తేదీన ఓటీటీలో పుష్ప విడుదల చేయనున్నారు. ఇందుకు సంబంధించిన మూవీ మేకర్స్ కూడా అధికారిక ప్రకటన చేశారు.

ఇదిలావుంటే, ఈ చిత్రం హిందీ వెర్షన్‌ను ఓవర్సీస్‌లో విడుదల చేసేలా సన్నాహాలు చేస్తున్నారు. తెలుగులో అక్కడ ఈ సినిమాను విడుదల చేసిన సంస్థ వారే హిందీ వెర్షన్‌ను కూడా విడుదల చేయనున్నారు. హిందీలో ఈ చిత్రం కేవలం 15 రోజుల్లో ఏకంగా రూ.50 కోట్లు రాబట్టింది. ఇపుడు రూ.100 కోట్ల దిశగా వడివడిగా అడుగులు వేస్తుంది.