అల్లు అర్జున్ - సుకుమార్ కాంబినేషన్‌లో వచ్చిన 'పుష్ప' చిత్రం సక్సెస్ మీట్ మంగళవారం హైదరాబాద్ నగరంలో జరుగుతోంది. ఇందులో చిత్ర బృందం సభ్యులంతా పాల్గొని ఈ చిత్రాన్ని ఇంతటి ఘన విజయం చేసిన ప్రతి ఒక్కరికీ ధన్యవాదాలు తెలుపుతున్నారు. ముఖ్యంగా నిర్మాతల్లో ఒకరైన నవీన్ ఈ చిత్రం కలెక్షన్ల వివరాలను వెల్లడించారు.
అలాగే, ఇందులో మంగళం శీనుగా విలన్ పాత్రలో కనిపించిన హాస్య నటుడు సునీల్ మాట్లాడుతూ, విలన్ పాత్రల కోసం సినిమా పరిశ్రమకు వచ్చానని, కానీ, హాస్య నటుడుగా, హీరోగా నటించాల్సివచ్చిందన్నారు.
తన చిరకాల కల మాత్రం ఇన్నేళ్ళకు నెరవేరిందన్నారు. పైగా, ఈ చిత్రం ద్వారా పాన్ ఇండియా విలన్‌గా తనను పరిచయం చేసిన దర్శకుడు సుకుమార్, హీరో అల్లు అర్జున్‌కు ప్రత్యేక ధన్యవాదాలు అని తెలిపారు.
ఇకపోతే, ఈ నెల 17వ తేదీన విడుదలైన ఈ చిత్రం కలెక్షన్లు ఇప్పటికీ ఏమాత్రం తగ్గలేదు. ముఖ్యంగా హిందీలోనూ కలెక్షన్ల వర్షం కురిపిస్తుంది. శుక్రవారం రూ.2.31 కోట్లు, శనివారం రూ.3.75 కోట్లు, ఆదివారం రూ.4.25 కోట్లు, సోమవారం రూ.2.75 కోట్లు చొప్పున కలెక్షన్స్ వచ్చాయి.
ఒక్క హిందీలోనే ఇప్పటివరకు రూ.39.95 కోట్లను రాబట్టిందని నిర్మాతలు వివరించారు. అలాగే, దేశ వ్యాప్తంగా రికార్డు స్థాయిలో వసూళ్లు రాబడుతోందని మైత్రీ మూవీ మేకర్స్ తెలిపింది. టాలీవుడ్‌లో మరో పెద్ద చిత్రం విడుదలయ్యేంత వరకు పుష్ప సినిమా రికార్డుల హోరు కొనసాగనుంది.
