బాలీవుడ్ మిస్టర్ పర్ఫెక్షనిస్ట్ ఆమిర్‌ఖాన్ గురువారం నాడు తన 54వ పుట్టినరోజును ఘనంగా జరుపుకున్నాడు. భార్య కిరణ్ రావ్‌తో కలిసి ముంబైలోని బాంద్రాలో ఉన్న తన ఇంటిలో కేక్ కట్ చేసాడు. ఈ సందర్భంలో అభిమానులకు ఓ సందేశం ఇచ్చాడు. ఈ ఎన్నికల సంవత్సరంలో దేశ ప్రజలందరూ ఖచ్చితంగా ఓటు వేయాలని, ఎన్నికలను విజయవంతం చేయాల్సిందిగా కోరాడు.
లోక్‌సభ ఎన్నికల్లో భారీ పోలింగ్ నమోదైయ్యేలా ఓటర్లను ప్రోత్సహించాలని బుధవారం నాడు ప్రధాని నరేంద్ర మోదీ దేశంలోని సెలబ్రిటీలందరికీ ట్వీట్లు చేసిన సంగతి తెలిసిందే. అమీర్‌ఖాన్ తన బర్త్ డే సందర్భంగా ఓట్లు వేయాల్సిందిగా అభిమానులకు పిలుపునిచ్చాడు. అయితే ఎన్నికల్లో మీరు బీజేపీకి మద్దతిస్తారా అని అడిగిన ప్రశ్నకు.. లేదు అని సమాధానమిచ్చాడు. తాను ఏ రాజకీయ పార్టీకి మద్దతివ్వను అని ఆమిర్ స్పష్టం చేసాడు.
విదేశాల్లో ఉండే భారతీయులు, ఆనారోగ్యం కారణంగా బ్యాలెట్ బాక్స్ వరకు రాలేని వాళ్ల కోసం ఎన్నికల సంఘం ఏదైనా పరిష్కారం ఆలోచించాలని అమీర్ కోరాడు. తొలిసారి ఓటు వేయబోతున్న ఓటర్లకు కూడా ఆయన ఓ సందేశం ఇచ్చాడు. వాళ్లు ఎవరికి, ఎలా ఓటు వేయాలో చెప్పననీ..తమ నియోజకవర్గంలోని అభ్యర్థి హామీలను నెరవేరుస్తాడా లేదా అన్నది చూసి ఓటేయాలి అని పిలుపునిచ్చాడు.