షూటింగ్ ప్రారంభమైతేనే.. అప్పటివరకు ఆశలుపెట్టుకోవద్దు: రాజమౌళి

దర్శక దిగ్గడం రాజమౌళి తెరకెక్కిస్తున్న చిత్రం ఆర్ఆర్ఆర్ (రౌద్రం రణం రుధిరం). బాహుబలి తర్వాత జక్కన్న దర్శకత్వం వహిస్తున్న చిత్రం. ఈ చిత్రంపై భారీ అంచనాలే నెలకొనివున్నాయి. రూ.350 కోట్ల భారీ బడ్జెట్‌తో ఈ చిత్రాన్ని ప్రముఖ నిర్మాత డీవీవీ దానయ్య నిర్మిస్తున్నారు. 

ఈ చిత్రం షూటింగ్ చివరి దశలో ఉండగా, ప్రపంచాన్ని కరోనా వైరస్ కమ్మేసింది. దీంతో ఈ చిత్రం షూటింగుకు బ్రేక్ పడింది. నిజానికి ఈ యేడాది జూన్ నెలలో ఈ చిత్రం విడుదల చేయాల్సివుంది. కానీ అది సాధ్యపడకపోవడంతో వచ్చే యేడాది వేసవికి వాయిదావేశారు. ఇపుడు నెలకొన్న పరిస్థితుల దృష్ట్యా అదికూడా సాధ్యపడేలా కనిపించడం లేదు. 

మరోవైపు, ఈ చిత్రంపై నెలకొన్న భారీ అంచనాలకు తగినట్టుగానే రాజమౌళి చిత్రాన్ని తెరకెక్కిస్తున్నారు. ఈ విషయం ఇప్పటికే నిరూపితమైంది. ఇప్పటికే విడుదలైన రాం చ‌ర‌ణ్‌కు సంబంధించిన ఈ సినిమాలోని ఫస్ట్‌లుక్, ప్రోమో అందరినీ అలరించాయి. అల్లూరి సీతారామరాజుగా చెర్రీ లుక్ అదిరిపోయింది.

మరోహీరో ఎన్టీఆర్‌ పుట్టిన రోజు సందర్బంగా తారక్‌ ఫ‌స్ట్‌లుక్, టీజ‌ర్‌ వస్తాయని అందరూ భావించగా తీవ్ర నిరాశే మిగిలింది. ఈ లుక్ వాయిదా పడడంతో ఇప్పుడు అభిమానులంతా దా‌ని కోసం ఎదురు చూస్తున్నారు. అది ఎప్పుడు విడుదలవుతుందన్న విషయంపై రాజమౌళి స్పందించారు. 

తాజాగా ఓ ఇంటర్వ్యూలో ఆయన మాట్లాడుతూ.. ఈ సినిమాలోని ఎన్టీఆర్‌.. కొమురం భీమ్ లుక్‌ను "ఆర్‌ఆర్‌ఆర్‌" షూటింగ్ మళ్లీ మొద‌లైన ప‌ది రోజుల అనంతరం విడుద‌ల చేస్తామ‌ని తెలిపారు. కరోనా కారణంగా షూటింగులు తిరిగి ప్రారంభం కావాల్సివుందన్నారు.