మహేష్ బాబుకు పిన్నిగా బాలీవుడ్ నటి!

టాలీవుడ్ ప్రిన్స్ మహేష్ బాబు తన 28వ చిత్రాన్ని స్టార్ డైరెక్టర్ త్రివిక్రమ్ శ్రీనివాస్ దర్శకత్వంలో చేయనున్నారు. ఇందుకు సంబంధించిన ప్రీప్రొడక్షన్ కార్యక్రమాలు జోరుగా సాగుతున్నాయి. ఈ చిత్రంలో హీరోకు పిన్నిగా బాలీవుడ్ సీనియర్ నటి శిల్పాశెట్టి నటించనుందనే టాక్ వినిపిస్తోంది. 

ఈ పాత్ర సినిమాకు చాలా కీల‌కంగా మారుతుందని అంటున్నారు. కాగా, గ‌తంలో నదియా, ఖుష్బూ, దేవయాని, టబుల‌ని త‌న సినిమాలో ప్ర‌త్యేక పాత్ర కోసం ఎంపిక చేశాడు. 11 ఏళ్ల త‌ర్వాత త్రివిక్ర‌మ్ - మ‌హేష్ కాంబినేష‌న్‌లో మూవీ వ‌స్తుండ‌డంపై అంచ‌నాలు భారీగా నెల‌కొన్నాయి.

మరోవైపు, శిల్పాశెట్టి ఒకప్పుడు తెలుగు, హిందీ భాష‌ల‌లో ఎంత‌గా అల‌రించింది. వెంకటేష్ నటించిన ‘సాహసవీరుడు సాగరకన్య’ సినిమాలో న‌టించ‌గా ఈ సినిమా మంచి హిట్ సాధించింది. ఆ తర్వాత నాగార్జునతో ‘ఆజాద్’లో, మెహన్‌బాబుతో ‘వీడెవడండి బాబు’, బాలకృష్ణతో ‘భలేవాడివి బాసు’ వంటి చిత్రాలు చేసింది. పెళ్లి త‌ర్వాత కాస్త సినిమాలు త‌గ్గించిన శిల్పా సోష‌ల్ మీడియా ద్వారా అభిమానుల‌కు ట‌చ్‌లో ఉంటుంది.