చైనా సరిహద్దులో పోరాడుతూ అమరుడు అయిన కల్నల్ సంతోష్ బాబు కుటుంబానికి తెలంగాణ ప్రభుత్వం చేయూత అందించింది. బంజారాహిల్స్ రోడ్ నెంబర్ 14లో కేబీఆర్ పార్కుకు ఎదురుగా ఉన్న విలువైన 711 గజాల స్థలం కేటాయించింది.
కల్నల్ సంతోష్ కుటుంబ సభ్యుల కోరిక మేరకు బంజారా హిల్స్‌లో స్థలం కేటాయింపు జరిపింది. సంతోష్ బాబు సతీమణికి ఇంటి స్థలం పత్రాలను హైదరాబాద్ కలెక్టర్ శ్వేత మహంతి తుంగతుర్తి ఎమ్మెల్యే గాదరి కిషోర్ అందించారు. సంతోష్ బాబు భార్య సంతోషికి ప్రభుత్వం డిప్యూటీ కలెక్టర్ ఉద్యోగం ఇస్తూ దీనికి సంబంధించిన ఉత్తర్వులను ముఖ్యమంత్రి కేసీఆర్ బుధవారం ప్రగతి భవన్లో అందించారు.
సంతోషికి హైదరాబాద్, పరిపర ప్రాంతాల్లోనే పోస్టింగ్ ఇచ్చి, సరైన శిక్షణ ఇప్పించి, ఉద్యోగంలో కుదరుకునే వరకు తోడుగా ఉండాలని సిఎం తన కార్యదర్శి స్మితా సభర్వాల్‌ను కోరారు. సంతోషితో పాటు వచ్చిన 20 మంది కుటుంబ సభ్యులతో కలిసి ముఖ్యమంత్రి మధ్యాహ్న భోజనం చేశారు. వారి యోగక్షేమాలు తెలుసుకున్నారు. సంతోష్ బాబు కుటుంబానికి ప్రభుత్వం ఎల్లప్పుడూ అండగా ఉంటుందని సిఎం హామీ ఇచ్చారు.