హైదరాబాద్ నగరంలో దౌర్జన్యాలు, దారుణాలు నానాటికీ పెరిగిపోతున్నాయి. తాజాగా పట్టపగలు నడి రోడ్డుపై ఓ పోలీస్ కానిస్టేబుల్‌పై ఓ బైకర్ బీరు బాటిల్‌తో దాడికి తెగబడ్డాడు. కమాండ్ కంట్రోల్ సెంటర్‌ వద్దే ఈ దాడి జరిగింది. బంజారా హిల్స్ పోలీస్ స్టేషన్ పరిధిలోని అతి వేగంగా వచ్చిన బైకర్ ఖాజా ఓ కారును ఢీకొట్టాడు. దీంతో కారు డ్రైవర్, బైకర్ ఖాజాలు ఇద్దరూ నడిరోడ్డుపై వాగ్వాదానికి దిగారు. వారిద్దరిని వారించేందుకు కానిస్టేబుల్ శ్రీకాంత్ ప్రయత్నించాడు.
అయితే, బైకర్ ఖాజా ఆగ్రహంతో ఊగిపోతూ పక్కనే ఉన్న బీరు బాటిల్‌ను తీసుకుని కానిస్టేబుల్ శ్రీకాంత్‌పై దాడికి తెగబడ్డాడు. ఈ దాడిలో కానిస్టేబుల్ తలకు బలమైన గాయం తగిలింది. కానిస్టేబుల్ శ్రీకాంత్ బంజారా హిల్స్ పోలీసులకు ఫిర్యాదు చేయడంతో పోలీసులు బైకర్ ఖాజాను అదుపులోకి తీసుకున్నారు. కేసు నమోదు చేసి విచారణ జరుపుతున్నారు.