మోదీ వ్యక్తిగతంగా మంచోడే కానీ విధానాలే నాట్ గుడ్.. ఊర్మిళ

బాలీవుడ్ నటి ఊర్మిళా మతోండ్కర్ కాంగ్రెస్ పార్టీ తీర్థం పుచ్చుకున్న సంగతి తెలిసిందే. కాంగ్రెస్ పార్టీలో చేరారో లేదో రెండు మూడు రోజుల్లోనే ప్రధాన మంత్రి నరేంద్ర మోదీపై విమర్శలు గుప్పించారు. కాంగ్రెస్ పార్టీ తీర్థం పుచ్చుకోవడం ద్వారా దేశంలో సమస్యలపై పోరాడేందుకు తనకు మంచి వేదిక దొరికిందని ఊర్మిళ చెప్పుకొచ్చారు.

మోదీ వ్యక్తిగతంగా మంచోడే అయినప్పటికీ ఆయన విధానాలు మాత్రం మంచివి కావని చెప్పారు. ప్రస్తుతం దేశంలో పరిస్థితులు ఏమంత బాగోలేవన్నారు. అన్నింటిలోనూ మతం ప్రధాన పాత్ర వహిస్తోందని ఊర్మిళ ఆవేదన వ్యక్తం చేశారు. మోదీ విధానాలు మాత్రం మంచివి కావని.. ఆయన విధానాల వల్ల ప్రజల్లో రోజు రోజుకి అసంతృప్తి, అసహనం పెరిగిపోతుందని చెప్పుకొచ్చారు. 

తాను కాంగ్రెస్‌లో చేరడానికి ముందే గాంధీ, నెహ్రూల గురించి పూర్తిగా చదివి తెలుసుకున్నట్టు చెప్పారు. తన కుటుంబం కాంగ్రెస్ సిద్ధాంతాలను అనుసరిస్తుందన్నారు. దేశంలో మతం పేరుతో దాడులు, చంపుకోవడాలు దారుణమన్నారు. ఇచ్చిన హామీలను మోదీ అమలు చేయలేకపోయారని, ఫలితంగా దేశంలో నిరుద్యోగం విపరీతంగా పెరిగిపోయిందని ఆరోపించారు.