'చంద్రయాన్-3' ప్రయోగానికి ముహూర్తం ఫిక్స్

భారత అంతరిక్ష పరిశోధనా సంస్థ (ఇస్రో) మరో బృహత్తర ప్రయోగానికి సిద్ధమైంది. ఈ నెల 14వ తేదీన "చంద్రయాన్-3" ప్రయోగం చేపట్టనుంది. ఇప్పటికే చేపట్టిన తొలి రెండు దఫాల 'చంద్రయాన్' ప్రయోగాలు మిశ్రమ ఫలితాలు వచ్చాయి. దీంతో మూడోసారి మాత్రం మరిన్ని జాగ్రత్తలు తీసుకుని ఈ ప్రయోగం చేపట్టేందుకు అన్ని ఏర్పాట్లు పూర్తి చేసింది. 

ఇందుకోసం 'చంద్రయాన్-3' ప్రయోగానికి మూహూర్తం ఖరారు చేసింది. జులై 14న మధ్యాహ్నం 2.35 గంటలకు చంద్రయాన్-3లో భాగంగా జీఎస్ఎల్వీ-ఎంకే 3 లేక ఎల్వీమ్ 3 నింగిలోకి దూసుకెళ్లనుంది. ఈ ప్రతిష్టాత్మక ప్రయోగం కోసం శ్రీహరికోటలోని సతీశ్ ధావన్ రాకెట్ ప్రయోగ కేంద్రం (షార్ సెంటర్) సన్నద్ధమవుతోంది. 'చంద్రయాన్-2'లో ఆర్బిటర్, ల్యాండర్, రోవర్ ఉండగా... చంద్రయాన్-3లో ప్రొపల్షన్, ల్యాండర్, రోవర్‌ను పొందుపరిచారు.

'చంద్రయాన్-2'లోని ల్యాండర్ చంద్రుడి ఉపరితలంపై దిగే క్రమంలో విఫలమైన నేపథ్యంలో, అనేక మార్పులు చేర్పులతో 'చంద్రయాన్-3' ల్యాండర్‌‌లో అభివృద్ధి చేశారు. విక్రమ్ ల్యాండర్‌కు బలమైన కాళ్లు అమర్చారు. అత్యధిక వేగంగా దిగినప్పటికీ దెబ్బతినని రీతిలో ల్యాండర్‌కు రూపకల్పన చేశారు. ఇంజిన్, సెన్సర్, థ్రస్ట్ వైఫల్యాలను గుర్తించి చక్కదిద్దేందుకు అధునాతన సాఫ్ట్ వేర్ ఉపయోగించనున్నారు. 

'చంద్రయాన్-2' నుంచి నేర్చుకున్న గుణపాఠాల నేపథ్యంలో, 'చంద్రయాన్-3'లో సెంటర్ ఇంజిన్ లేదా ఐదో ఇంజిన్‌ను తొలగించనున్నారు. ఇక, విక్రమ్ లాండర్ చంద్రుడిపై సూర్యరశ్మి సోకని ప్రాంతంలో ల్యాండైనప్పటికీ ఇంధన శక్తిని పొందేందుకు వీలుగా మరిన్ని సోలార్ ప్యానెళ్లు ఏర్పాటు చేస్తున్నామని ఇస్రో చైర్మన్ సోమ్‌నాథ్ తెలిపారు.