Satya Nadella : భారతదేశంలో భారీ పెట్టుబడులు.. సత్య నాదెళ్ల ప్రకటన.. ఎంతో తెలుసా?

మైక్రోసాఫ్ట్ ఛైర్మన్, సీఈవో సత్య నాదెళ్ల భారతదేశంలో భారీ పెట్టుబడులకు గ్రీన్ సిగ్నల్ ఇచ్చారు.  దేశంలో $3 బిలియన్ల పెట్టుబడిని ప్రకటించారు. కంపెనీ క్లౌడ్ సేవలు, కృత్రిమ మేధస్సు (AI) సామర్థ్యాలు, డేటా సెంటర్లను విస్తరించే లక్ష్యంతో ఈ పెట్టుబడులు పెట్టనున్నట్లు ప్రకటించారు. 2030 నాటికి 10 మిలియన్ల మందికి AI నైపుణ్యాల శిక్షణ అందించడమే ఈ పెట్టుబడి కీలక లక్ష్యమని ఆయన వెల్లడించారు.

మంగళవారం బెంగళూరులో జరిగిన ఓ కార్యక్రమంలో నాదెళ్ల ఈ విషయాన్ని వెల్లడించారు. ప్రస్తుతం భారతదేశాన్ని సందర్శిస్తున్న ఆయన సోమవారం నాడు ప్రధానమంత్రి నరేంద్ర మోదీని కూడా కలిశారు, అక్కడ AI రంగంలో భారతదేశం ప్రపంచ స్థానాన్ని అభివృద్ధి చేయడానికి నిబద్ధతతో వున్నట్లు పేర్కొన్నారు. 2047 నాటికి భారత్‌ను అభివృద్ధి చెందిన దేశంగా తీర్చిదిద్దాలన్న మోదీ దార్శనికతను సాధించేందుకు మైక్రోసాఫ్ట్ సహకరిస్తుందని ఆయన ఉద్ఘాటించారు.

భారతదేశం టాలెంట్ పూల్‌పై తన ఆలోచనలను పంచుకున్న నాదెళ్ల, కొత్త నైపుణ్యాలను అలవర్చుకోవడానికి భారతీయ నిపుణుల ఆసక్తిని ప్రశంసించారు. లింక్డ్‌ఇన్ డేటాను ఉటంకిస్తూ, లింక్డ్‌ఇన్ ప్రొఫైల్‌లలో AI నైపుణ్యాలను ప్రపంచవ్యాప్తంగా స్వీకరించడం 71% పెరిగిందని, భారతదేశం 122% వృద్ధిని సాధించిందని ఆయన హైలైట్ చేశారు.

మైక్రోసాఫ్ట్  "అడ్వాంటేజ్ ఇండియా" కార్యక్రమంతో, 2025 నాటికి 2 మిలియన్ల AI నిపుణులకు శిక్షణ ఇవ్వాలని లక్ష్యంగా పెట్టుకుంది. ఇది ఇప్పటికే షెడ్యూల్ కంటే ముందే సాధించబడిందని ఆయన పేర్కొన్నారు. 2030 నాటికి 10 మిలియన్ల మందికి శిక్షణ ఇవ్వాలనే కొత్త లక్ష్యం భారతదేశం డిజిటల్ వృద్ధిని ప్రోత్సహించడంలో మైక్రోసాఫ్ట్  కీలక పాత్ర పోషిస్తుందని చెప్పారు. 3 బిలియన్ డాలర్ల పెట్టుబడిని మైక్రోసాఫ్ట్‌కు గర్వకారణమైన మైలురాయిగా భావిస్తోంది. ఇంకా భారతదేశంలో AI ఆవిష్కరణను నడపడానికి అవసరమైన అడుగు అని నాదెళ్ల అభివర్ణించారు. దేశంలో సాంకేతిక రంగం పురోగమనానికి ఈ చొరవ గణనీయమైన ఉత్ప్రేరకంగా ఉపయోగపడుతుందని ఆయన పేర్కొన్నారు.<>