సోషల్ మీడియాలో మీరు గేమ్స్ ఆడుతున్నారా? అదీ అమ్మాయిలై చాలా అప్రమత్తంగా వుండాలని ఐటీ నిపుణులు హెచ్చరిస్తున్నారు. అందులోనూ 'ట్రూత్ ఆర్ డేర్' గేమ్ ఆడేటప్పుడు అమ్మాయిలూ చాలా జాగ్రత్తగా ఉండాలి. లేకపోతే మిమ్మల్ని బ్లాక్‌మెయిల్ చేసే అవకాశముంది. తాజాగా ఈ గేమ్ ద్వారా ఓ అమ్మాయి ఇబ్బందుల్లో చిక్కుకుంది.
వివరాల్లోకి వెళితే.. ముంబైకి చెందిన ఓ 13 సంవత్సరాల బాలుడు.. తన స్కూల్‌మేట్ అయిన ఓ విద్యార్థిని(14)కి ఇన్‌స్టాగ్రామ్‌లో రెక్వెస్ట్ పంపాడు. అయితే గుర్తు తెలియని ఫోటో, ప్రొఫైల్‌తో ఆ విద్యార్థినికి రెక్వెస్ట్ పంపగా ఆమె అంగీకరించింది. కొద్ది రోజులకు వీరిద్దరి మధ్య మంచి ఫ్రెండ్‌షిప్ ఏర్పడింది. దీంతో ఇద్దరూ కలిసి 'ట్రూత్ ఆర్ డేర్' గేమ్ ఆడటం మొదలు పెట్టారు.
ఒకరోజు గేమ్‌లో భాగంగా డేర్ చేయాలని ఆ అమ్మాయికి అబ్బాయి సందేశం పంపాడు. దుస్తులు విప్పాలని ఆదేశించడంతో గేమ్ పరంగా ఆమె దుస్తులు విప్పేసింది. ఇదంతా లైవ్‌లోనే జరుగుతుంది. దీంతో అతను ఆమెకు తెలియకుండా తన ఫోన్‌లో రికార్డు చేశాడు.
మళ్లీ మళ్లీ బట్టలు విప్పాలని విద్యార్థినికి ఆ యువకుడు గేమ్ ఛాలెంజ్ చేశాడు. దుస్తులు విప్పకపోతే వీడియోలు వైరల్ చేస్తానని ఆమెను బెదిరించాడు. మొదటిసారి దుస్తులు విప్పిన వీడియోను ఆమెకు పంపి బ్లాక్ మెయిల్ చేయడం మొదలెట్టాడు. దీంతో విసుగెత్తిపోయిన ఆ యువతి పోలీసులకు ఫిర్యాదు చేసింది.
కేసు నమోదు చేసుకున్న పోలీసులు దర్యాప్తు చేపట్టారు. ఐపీ అడ్రస్ ఆధారంగా బ్లాక్ మెయిల్‌కు పాల్పడుతున్న యువకుడిని పోలీసులు గుర్తించారు. తన స్కూల్‌మేట్ అని తెలియడంతో విద్యార్థిని షాక్‌కు గురైంది. ఆ యువకుడి తల్లిదండ్రులు కూడా ఖంగుతిన్నారు.