మెగా మిలియన్ డ్రా.. ప్రైజ్ మనీ 160 కోట్ల డాలర్లు.. అదృష్టవంతువుడెవరో?

అమెరికా లాటరీ చరిత్రలోనే మెగా మిలియన్ డ్రాను ఈనెల 23వ తేదీన ప్రకటించనున్నారు. ఈ లాటరీలో విజేతలుగా నిలిచేవారికి 160 కోట్ల డాలర్లను బహుమతిగా అందజేయనున్నారు. అంటే భారతీయ కరెన్సీలో ఈ మొత్తం విలువ రూ.11,756 కోట్లు. మంగళవారం మెగా మిలియన్స్ డ్రాలో ఈ మొత్తం అందుబాటులో ఉండనుంది.

నిజానికి గత శుక్రవారం నిర్వహించిన డ్రాలో ఎవరూ దీనిని గెలుచుకోలేకపోయారు. శుక్రవారం రాత్రి నిర్వహించిన డ్రాలో ఎవరూ 15, 23, 53, 65, 70, మెగా బాల్ 7 నంబర్లను అందుకోలేకపోయారు. ఇప్పుడు మంగళవారం నిర్వహించబోయే డ్రాలో ఎవరైనా ప్లేయర్ ఈ ఆరు నంబర్లను సాధించగలిగితే ఈ జాక్‌పాట్‌ను సొంతం చేసుకోవచ్చు. కానీ, మెగా మిలియన్స్ జాక్‌పాట్‌ను గెలిచే అవకాశం చాలా చాలా తక్కువగా ఉంటుంది. 

ఒకవేళ ఎవరైనా గెలుచుకుంటే మాత్రం ఈ ప్రైజ్ మనీని రెండు విధాలుగా అందచేస్తారు. అప్పటికప్పుడు డబ్బులు కావాలంటే 90.4 కోట్ల డాలర్లు (సుమారు రూ.6600 కోట్లు) అందచేస్తారు. లేదా 160 కోట్ల డాలర్ల మొత్తాన్ని రానున్న 29 ఏళ్లలో విడతల వారీగా అందజేస్తారు. 

అమెరికా చరిత్రలోనే పవర్‌బాల్ అతి పెద్ద లాటరీ ప్రైజ్‌మనీ అందిస్తూ వస్తోంది. గతంలో 2016లో అత్యధికంగా 158 కోట్ల డాలర్ల ప్రైజ్‌మనీ అందించింది. మెగా మిలియన్స్ టికెట్లను అమెరికాలోని 44 రాష్ట్రాలతోపాటు డిస్ట్రిక్ట్ ఆఫ్ కొలంబియా, వర్జిన్ ఐలాండ్స్‌లో అమ్ముతారు. ఒకరి కంటే ఎక్కువ విజేతలు వస్తే ప్రైజ్‌మనీని సమానంగా పంచుతారు. మొత్తం 24 మెగా మిలియన్స్ డ్రాలలో జులై 24 నుంచి ఒక్క టాప్ విన్నర్ కూడా లేకపోవడం గమనార్హం.