గాల్లో ఎగిరే కార్లు వచ్చేస్తున్నాయి!

కారులో అలా ఆకాశానికి వెళ్లి... ఇలా షికారు చేసే రోజులు వచ్చేశాయి.. ఘరో రెండేళ్లలో మనం దీనిని చూడబోతున్నాం. కాదు,కాదు.. అనుభవించబోతున్నాం. నెదర్లాండ్‌కు చెందిన 'పాల్‌ వీ' అనే సంస్థ గాల్లో ఎగిరే కారును సిద్ధం చేసింది.

ఈ పాల్‌ వీ కారు తయారీకి 20 ఏళ్లు పట్టిందిమరి. యూరప్‌లో అన్ని రకాల ప్రభుత్వ అనుమతులను కంపెనీ పొందింది. ఈ కారు వినియోగదారులకు అందుబాటులోకి రావడానికి 2022 వరకు ఆగాల్సిందే.

అప్పటికి కారును అందుబాటులోకి తేవడానికి కంపెనీ అన్ని సన్నాహాలు చేస్తోంది. ఈలోపు విమానంగా ఉపయోగించేందుకు అవసరమైన అన్ని అనుమతులను సాధించే ప్రయత్నాల్లో కంపెనీ నిమగ్నమయింది.

ఈ ఎగిరే కారు పేరు 'ది లిబర్టీ'. కారు బరువు తగ్గడానికిగాను మూడు చక్రాలతో ఈ కారును తయారు చేశారు. నాలుగు చక్రాల వాహనాలతో పోలిస్తే ఈ 3 చక్రాల వాహనానికి లైసెన్సు కూడా సులువుగా లభిస్తుందండోయ్. రోడ్డుపై వెళ్లేటప్పుడు ' ది లిబర్టీ ' రెక్కలు పైభాగంలో ముడుచుకొని ఉంటాయి.

విమానంగా మారేటప్పుడు రెక్కలు విచ్చుకుంటాయి. 100 హెచ్‌పి ఉన్న ఇంజిన్‌తో ఇది తొమ్మిది సెకన్లలోనే వంద కిలోమీటర్ల వేగాన్ని అందుకుంటుంది. ఇంకేముంది.. ఎంచక్కా.. కారులో మహాస్పీడ్‌తో దూసుకుపోవచ్చు.

రెండు సీట్లు మాత్రమే ఈ కారులో ఉంటాయి. గాలిలో ఇది గంటకు 180 కిలోమీటర్ల వేగంతో ప్రయాణించగలదు. టేకాఫ్‌ కోసం వెయ్యి అడుగుల రన్‌వే అవసరం. ల్యాండ్‌ అయ్యేందుకు వంద అడుగుల దారి సరిపోతుంది. ఇంధన ట్యాంకులో వంద లీటర్ల ఇంధనాన్ని నింపుకొంటే 500 కిలోమీటర్ల దూరం ప్రయాణించొచ్చు.

అదనంగా మరో అరగంట పాటు నడిచేందుకు రిజర్వ్‌ ట్యాంకు కూడా ఉందండోయ్. రోడ్డుపై వెళ్లేటప్పుడు మైలేజీ లీటర్‌కు 13 కిలోమీటర్ల వరకు ఉంటుంది.