ఎల్ఐసీలో 9394 పోస్టులు - ప్రిలిమ్స్ పరీక్షా ఫలితాలు రిలీజ్

భారతీయ బీమా సంస్థ (ఎల్.ఐ.సి)కు చెందిన కార్యాలయాల్లో దేశ వ్యాప్తంగా అప్రెంటిస్ డెవలప్‌మెంట్ ఆఫీసర్ (ఏడీవో) పోస్టుల భర్తీ కోసం నిర్వహించిన ప్రిలిమినరీ పరీక్షా ఫలితాలను తాజాగా వెల్లడించారు. ఈ దఫాలో మొత్తం 9394 పోస్టులను భర్తీ చేయనున్నారు. జోన్ వారీగా మొత్తం 9,394 ఏడీవో పోస్టులను భర్తీ చేసేందుకు గత జనవరిలో భారీ నోటిఫికేషన్‌ జారీ చేశారు. 

ఇందులో దక్షిణ మధ్య జోనల్‌ ఆఫీస్‌ (హైదరాబాద్‌) పరిధిలోనే 1,408 పోస్టులు ఉన్నాయి. ఈ ఉద్యోగాల భర్తీ కోసం మార్చి 12న ప్రిలిమినరీ పరీక్ష నిర్వహించగా.. సోమవారం జోన్‌ల వారీగా ఫలితాలను పీడీఎఫ్‌ రూపంలో అందుబాటులో ఉంచారు. ప్రిలిమ్స్‌ పరీక్షలో అర్హత సాధించిన అభ్యర్థులంతా ఏప్రిల్‌ 23న జరిగే మెయిన్స్‌ పరీక్షను రాయాల్సి ఉంటుంది. మెయిన్‌లోనూ అర్హత సాధించిన అభ్యర్థులకు ఇంటర్వ్యూ, ప్రీ-రిక్రూట్‌మెంట్‌ మెడికల్‌ ఎగ్జామినేషన్‌ పరీక్ష నిర్వహించి ఆ తర్వాత ఉద్యోగాలకు ఎంపిక చేస్తారు. మెయిన్‌ పరీక్షకు సంబంధించిన అడ్మిట్‌ కార్డులను త్వరలోనే అందుబాటులో ఉంచనున్నారు.