వెయిటింగ్ లిస్ట్ ప్రయాణికులకు రైల్వే శాఖ ఓ శుభవార్త చెప్పింది. వెయిటింగ్ లిస్టులో ఉన్న ప్రయాణికులకు తక్షణం బెర్తు కేటాయించేందుకు రైల్వే శాఖ ప్రయత్నాలు చేపట్టింది. ఈ ప్రయత్నాలు శతాబ్ది, రాజధాని ఎక్స్‌ప్రెస్‌లలో ప్రయోగాత్మకంగా చేపట్టగా అవి విజయవంతమయ్యాయి. దీంతో మిగిలిన రైళ్ళలో కూడా ఈ తరహా విధానాన్ని అమలు చేయాలని రైల్వే శాఖ భావిస్తోంది.
సాధారణంగా వెయిటింగ్ లిస్టులో ఉన్న ప్రయాణికులకు కేటాయిస్తారు. అయితే రెండు, మూడు స్టేషన్‌ల వరకు ఎదురుచూసిన తర్వాత మాత్రమే టీటీఈ ఆ బెర్త్‌ను కేటాయిస్తాడు. ఇకపై అలాంటి అవసరం ఉండదని రైల్వే అధికారులు తెలిపారు.
మొదటి స్టేషన్‌ నుంచి రైలు బయలుదేరిన తర్వాత ఎవరైనా ప్రయాణికుడు కన్ఫర్మ్‌ అయిన తన టికెట్‌ను రద్దు చేసుకుంటే, వెంటనే ఆ టికెట్‌ను నిరీక్షణ జాబితాలో ఉన్న ప్రయాణికుడికి ఇస్తారు. రద్దయిన టికెట్‌ గురించి వెంటనే టీటీఈకి హ్యాండ్‌హెల్డ్‌ డివైజెస్‌ ద్వారా సమాచారం అందిస్తారు.
శతాబ్ది, రాజధాని ఎక్స్‌ప్రెస్‌ రైళ్లలో ఇప్పటికే ఈ ప్రాజెక్టును ప్రయోగాత్మకంగా నిర్వహించారు. మొదటి దశలో టీటీఈలకు 500, రెండో దశలో 8 వేల హ్యాండ్‌హెల్డ్‌ డివైజెస్‌ అందజేస్తారు. ఈ విధానాన్ని అని రైళ్లలో ప్రవేశపెట్టేందుకు రైల్వే శాఖ చర్యలు తీసుకుంది.