సోనూ సూద్... ఈ పేరు చెబితే ఇపుడు దేశంలో చాలామంది మనసున్న మారాజు అని చెపుతుంటారు. సోనూ కష్టాల్లో వున్నవారిని ఆదుకునేందుకు తన ఆస్తులను సైతం తాకట్టు పెట్టి మరీ సాయం చేస్తున్నారు. అభినవ కర్ణుడుగా పేరు తెచ్చుకున్న సోనూసూద్ అంటే ఇప్పుడు మహారాష్ట్ర పాలక పార్టీ మండిపడుతున్నట్లు భోగట్టా.
సోనూ సూద్‌కి క్రమంగా ప్రజల్లో మంచి పేరు వస్తోంది. ఆయన చేసే మంచి పనులు కారణంగా ఎక్కడికెళ్లినా ఆయనకు బ్రహ్మరథం పడుతున్నారు. ఇక ఆయన నివాసం వుంటున్న ముంబైలో అయితే పేదలకు చేతనైన సాయం చేస్తూ వారితో దేవుడు అని పిలిపించుకుంటున్నాడు.
కాగా ఆయన ముంబైలో వున్న తన నివాస బహుళ అంతస్తుల భవనాన్ని హోటల్‌గా మార్చారు. దానిపై వచ్చే ఆదాయం ఎంతనేది పక్కనపెడితే, నివాస భవనాన్ని హోటల్‌గా మార్చడంపై బృహన్ ముంబై మునిసిపల్ కార్పొరేషన్ అధికారులు ఆగ్రహం వ్యక్తం చేసారు.
ఆ భవనానికి నోటీసులు పంపించారు. దీనిపై సోనూ సూద్ స్పందిస్తూ... తను ఎలాంటి ఉల్లంఘనలకు పాల్పడలేదనీ, అన్ని అనుమతులు వున్నాయని చెప్పారు. ఒకే ఒక్కటి రావాల్సి వుందనీ, త్వరలో వచ్చేస్తుందని చెప్పుకొచ్చారు. ఇదిలావుంటే... సోనూ సూద్ కి ప్రజల్లో ఆదరణ పెరుగుతుండటంతో శివసేన ఓర్వలేకపోతుందని సోనూ ఫ్యాన్స్ కొందరు విమర్శిస్తున్నారు.