వివాహంలో వధువు ఆశీర్వాదం తీసుకున్న వరుడు.. వీడియో వైరల్

మన సమాజం వివాహజీవితం మొదలునుంచే పురుషుడికి లోబడి నడుచుకోవాలని సూచిస్తుంది. నిజానికి, సాంప్రదాయ వివాహాలలో జరిగే అనేక పద్ధతులు పితృస్వామ్యమైనవే. ఉదాహరణకు.. ఒక స్త్రీ పెళ్లికాగానే తన భర్త ఇంటికి వెళ్ళటానికి తన సొంత ఇంటిని విడిచిపెట్టాలనేది అందరికీ తెలిసిన విషయమే. 

అలాగే, పెళ్లి పందిట్లో వధువు తన భర్త పాదాలను తాకి ఆశీర్వాదం తీసుకోమని చెబుతుంటారు. చెప్పిన వాటికి తలవంచుతూ, గౌరవిస్తూ సర్దుకుపోయే గుణాన్ని స్త్రీ మాత్రమే అలవర్చుకోవాలనే సూచలను అధికంగా చేరవేస్తుంటారు. అయితే, కొన్ని జంటలు మాత్రం ఈ సంప్రదాయాలలో సమానత్వం తీసుకురావడానికి ప్రయత్నిస్తున్నారు. 

వధువు ఆశీర్వాదం... ఇటీవల ఒక బెంగాలీ వివాహంలో వధువు వరుడి ఆశీర్వాదం తీసుకున్న తరువాత, వరుడు కూడా వధువు ఆశీర్వాదానికి మోకాళ్లపై వంగి కూర్చుని ఆమెకు నమస్కరించాడు. వధువు ఆశీర్వాదం తర్వాత వరుడు నిలుచున్నాడు.

స్త్రీ-పురుష సమానత్వం, గౌరవం అనేవి మాటల్లో చెప్పడం కాదు చేతల్లో చూపడం అని నిరూపించిన ఈ పెళ్లి వీడియో ఇటీవల బాగా వైరల్‌ అయ్యింది. దంపతులిద్దరూ పరస్పరం గౌరవం ఇచ్చిపుచ్చుకోవడం, ప్రేమను పంచుకునే విధానాన్ని ఈ పద్ధతి సూచిస్తుందని నెటిజన్లు సైతం ప్రశంసిస్తున్నారు.