మెగా హీరో సినిమాలో అక్కినేని హీరో న‌టిస్తున్నాడా..?

మెగా హీరో సినిమాలో అక్కినేని హీరో న‌టిస్తున్నాడు. ఇప్పుడు ఇండ‌స్ట్రీలో ఇదే హాట్ టాపిక్. న‌మ్మ‌లేక‌పోతున్నారా..? కానీ.. ఇది నిజంగా నిజం. అయితే.. ఆ మెగా హీరో అల్లు అర్జున్ అయితే... అక్కినేని హీరో సుశాంత్. అవును కాళిదాసు సినిమాతో తెలుగు తెర‌కు ప‌రిచ‌యం అయిన ఈ అక్కినేని ఫ్యామిలీ హీరో సుశాంత్ క‌రెంట్, అడ్డా చిత్రాల‌తో ఆక‌ట్టుకుని చి ల సౌ సినిమాతో విజ‌యం సాధించాడు. 

ఈ సినిమా వ‌చ్చి దాదాపు సంవ‌త్స‌రం అవుతుంది. నెక్ట్స్ మూవీ ఎవ‌రితో చేయ‌నున్నాడా అని ఫ్యాన్స్ ఆస‌క్తిగా ఎదురు చూస్తుంటే... బ‌న్నీ సినిమాలో న‌టిస్తున్నాను అని చెప్పి షాక్ ఇచ్చాడు. 

ట్విట్ట‌ర్లో సుశాంత్ స్పందిస్తూ... అల్లు అర్జున్ 19వ చిత్రంలో న‌టిస్తున్నాను. ఈ రోజు షూటింగ్‌లో పాల్గొన్నాను. నా అభిమాన ద‌ర్శ‌కుల్లో ఒక‌రైన త్రివిక్ర‌మ్ గారు, బ‌న్నీ, ట‌బు గారు, పూజాల‌తో వ‌ర్క్ చేయ‌డం సంతోషంగా ఉంది. 

ఈ సినిమాలో న‌టించే అవ‌కాశం ఇచ్చిన గీతా ఆర్ట్స్, హారిక & హాసిని క్రియేష‌న్స్ సంస్థ‌ల‌కు థ్యాంక్స్ తెలియ‌చేస్తున్నాను. చిలసౌ త‌ర్వాత నేను చేస్తోన్న మ‌రో సాహ‌సం ఇది. ఈ అమేజింగ్ టీమ్ ద‌గ్గ‌ర చాలా ఎన్నోవిష‌యాలు నేర్చుకుంటాను అనే న‌మ్మ‌కం ఉంది. 

అయితే... ఇందులో త‌న పాత్ర ఏంటి అనేది మాత్రం ఇప్పుడు చెప్ప‌న‌న్నారు. చి ల సౌ విజ‌యం త‌ర్వాత హీరోగా మ‌రో సినిమా చేయ‌కుండా బ‌న్నీ సినిమాలో న‌టించ‌డం అంటే... నిజంగా సాహ‌స‌మే. మ‌రి... సుశాంత్ తీసుకున్న నిర్ణ‌యం సరైనదేనా..? కాదా..? అనేది తెలియాలంటే ఈ మూవీ రిలీజ్ వ‌ర‌కు ఆగాల్సిందే.